香香鼠膽怕邪 嘉欣誘仔見鬼

無綫藝員岑麗香、龔嘉欣、黃心穎、羅蘭、羅鈞滿、陳國峰及周志康，前晚到尖沙咀出席明珠台的《魅影星期六》宣傳活動，眾人以萬聖節打扮現身，龔嘉欣扮成魔女，黃心穎略騷事業線扮驅魔女俠，而香香則變身成為精靈仙子，密實的她只騷美腿。

入鬼屋腳震

眾藝員在台上講到對萬聖節的感覺，自認細膽的香香表示最怕鬼怪，因此萬聖節不敢玩鬼屋，她謂：「以前喺加拿大都有去主題公園玩鬼屋，但實在太驚，行到入去成個人已經震晒，自己好驚被嚇。萬聖節都試過扮巫婆同埋扮我爹哋，我爹哋睇到都覺得好好笑！」提到無綫裁員，香香坦言可惜，期望將來有機會與被裁的同事再合作，亦希望不會再炒人。

眾無綫藝人前晚以萬聖節造型出動。

龔嘉欣自言最怕貞子。

龔嘉欣就分享自己最難忘的鬼片，她表示：「最驚貞子！」說罷即被其他人取笑，龔嘉欣尷尬解釋謂：「喺電視機爬出嚟嗰啲呀！」

驚到施毒手

Dry了一排的龔嘉欣續說，未試過有男士約她玩鬼屋而乘機追求，笑言可以一試：「如果去鬼屋梗係要同男仔去啦，驚起上嚟都有人可以搣吓！」黃心穎則笑說：「細個有男仔約睇鬼片，但係啲男仔仲驚過我。」

文：影視組