鄭俊弘無名氏升呢 唱通無阻
鄭俊弘（Fred）每次哼着新歌《無名氏》，胸口總是一陣翳悶。每次被叫「茄哩啡」，總是介意得很。試過三餐拮据，攤大手板向家姐借錢增值八達通。終於他置諸死地而後生，一唱成名天下知，除圓夢出碟外，收入也水鬼升城隍，現在每次與家人開餐，終有能力自動波埋單，吐一口屈了十年的烏氣。
介意被叫茄哩啡
Fred曾演過無數個路人甲乙丙丁，試過為小角色而一日死三次。雖然他每次都用心演出，但亦曾被人叫茄哩啡而不開心。自從參加《星夢傳奇》後，無名氏一夜成名，相信不會有人再說：「而我不知鄭俊弘是誰。」
我終於出咗處男大碟喇！等咗呢日好耐，發夢又發咗好耐，成件事非常脫離現實咁。由2001年參加新秀後，當時以為可以出碟，直到依家，等咗都十幾年。今次新碟入面九首歌，每一首都係講自己嘢，有我靈魂喺度，寫歌填詞嘅人擺咗好多心機。如果真係要揀一首我最鍾意，咁就真係《無名氏》。
因為《無》算係我咁大個仔第一首歌，同埋真係講緊我嘅故事。講緊過往十幾年喺電視圈，直到我去《星夢傳奇》比賽嘅心情。尤其頭嗰幾句「瑣碎日子，小角被忽略時，純熟的台詞，誰又會入耳」，呢兩句就已經好到肉，講中我心聲。
咁多年嚟，最唔開心係聽到啲人話我係茄哩啡！咁我哋都係演員，好畀心機做每場戲、去研究戲劇。雖然唔起眼，可能真係閒角，但作為演員聽到呢三個字真係好刺耳。不過都有聽到一啲鼓勵嘅說話，有前輩見到我會讚我進步咗，會令我去再做好啲。
溝女內向似熊貓
有時不得不信「一命二運三風水」，短短幾年間，Fred無論事業、桃花運都順風順水。與秦沛女兒姜麗文的戀情一直疑幻疑真，每次提起這位緋聞女友時，他都含蓄地笑而不語。雖然打死唔認，不過他列出三大擇偶條件：孝順、心地好、識英文，大家會發現：「咦？咁似姜麗文嘅？」
我有次去意大利拍旅遊節目，有個藝術家幫我人體繪畫，畫咗隻熊貓，我就多口話我係「俊弘熊貓BB」，之後個個都叫我做熊貓，送好多熊貓嘅嘢畀我，老闆就話不如下首歌叫《熊貓》啦，最後將熊貓嘅性格，套落我對愛情觀嘅睇法度。
可能因為我比較靜態、內向、唔進取，係一個好被動嘅人，好似熊貓咁，淨係掛住食竹，等人去抱起佢。我拍拖嚟講，有啲真係女追男，通常都係女仔踏出第一步先，我係比較怕醜啲。其實諗諗吓都幾大鑊。我記得細個暗戀過一個女仔成三年，最後不了了之，可能到依家佢都唔知我鍾意過佢，因為我唔會搞小動作，到依家都係咁。
其實我擇偶條件最緊要係心地要善良，對屋企人好，因為同屋企人嘅關係可以睇得出一個人嘅性格，加上我由細到大都學功夫，係好尊敬長輩。最好係識講英文啦，因為我好多時要講英文先可以表達自己。（依家有冇拍拖先？）哎呀……唔知呀。
冇錢增值八達通
所以我依家都好明白新演員嘅感受，見到新一期訓練班又入嚟，我都盡量同大家傾吓偈，一齊開工都會叫佢哋加油。我覺得喺電視台，只要你肯勤力、肯付出、肯等，等嘅過程團火要繼續燒，增值自己，每人都會有佢嘅機會。
我承認參加咗《星》之後，做咗好多呢十年冇做過嘅嘢，補充番好多。收入真係好啲，但唔會咁誇張，總算叫做唔使擔心囉，可以去茶餐廳食個飯囉。之前最霉嘅日子試過冇錢增值八達通，連五十蚊都冇！記得嗰排近月尾，冇錢要問家姐「可唔可以借一百蚊畀我，如果唔係過唔到海，返唔到工。」所以依家都會好好報答番屋企人，有機會食飯都會我埋單。同埋對上一個新年終於唔使屋企人畀利是我，反而係我每個人都有派利是，辛苦晒佢哋咁多年照顧我。
怕怕醜醜 唔敢騷肌
2014年，對於Fred來說是出奇過出奇蛋的一年，因為一次過滿足了兩大願望。人生第一隻唱片面世，11月1日亦於九展舉行處男個唱「鄭俊弘 WELCOME TO MY DREAMS東 演唱會2014」。他說：「大家係嚟見證我夢想成真，自己揀定幾首影響我幾深嘅歌嚟唱，尤其係張學友、張國榮嘅歌，影響我好深。」
時下興爆肌，循例代千萬少女粉絲問，屆時會否露肉爆肌？他笑說：「我爆唔起，爆吓手臂啦。唔知呀，啲衫都未定，唔知爆邊一忽，如果知道啲衫爆邊忽，我就淨係操嗰忽啦。我之前睇杜德偉演唱會，佢除剩條底褲，我就……睇吓點啦！」相信粉絲必定期待除剩底褲的Fred吧！
筆錄：蔡菇
口述：鄭俊弘
場地：APM