林夏薇急求神 謙仔拉隊滾
台灣受颱風「鳳凰」吹襲，正於當地取景的無綫劇集《衝線》亦受牽連，昨因天氣問題取消宜蘭景點，令一眾演員有假放，齊齊出遊兼拜神，儼如旅行團般，林夏薇拉着米雪去拜神。而男主角羅仲謙（謙仔）則於到埗當日在火鍋店宴客，曾傳緋聞的蔡思貝亦不避嫌到場。
林夏薇、羅仲謙、蔡思貝、米雪、溫家偉等上周四隨劇集《衝線》大隊到台灣拍外景，原定會到台北、台中、宜蘭等地拍攝，奈何抵埗沒多久便打颱風，雖然台北方面未受太大影響，但劇組為安全起見，前晚決定取消到宜蘭的拍攝點，一眾演員對突如其來的額外假期感興奮。
取消宜蘭拍攝
從未踏足過當地的夏薇如大鄉里般，拉住米雪及陳奐仁當盲公竹四圍遊覽，期間他們到一間寺廟參拜，夏薇二話不說上前誠心求籤，祈求身體健康及事事順利。問到當地情況，夏薇謂：「又冇咩嘢，係今朝好大雨，但唔太擔心，係宜蘭嗰部分取消咗，甩咗一日，相信進度都OK。」她又指抵台後即投入拍攝，但期間也到過台北101參觀，又品嘗當地美食，她說：「我哋成班好開心，嚟嗰晚阿謙仲請大家打邊爐，所以今晚輪到我請食台式料理囉。（擔唔擔心食咗地溝油？）都唔擔心得咁多啦！」
蔡思貝座上客
而首晚已萬歲的謙仔，笑言難得聚首一堂，問到曾被指「姣溝」他的蔡思貝也是座上客，謙仔說：「冇所謂啦，唔尷尬，都冇嘢要尷尬。（打風你因禍得福有假期？）係呀，但又去得邊呀？都係晏晝出去食餐飯，之後就返酒店瞓覺，哈哈！之後仲要開工嘛！」
文：影視組