張繼聰被撩出賽 Kay剷爆隊友
藝人張繼聰大前晚在籃球場上因無心的碰撞差點咬穿脷，足足縫了五針的他連進食都有困難，但隊友們居然唔知死想慫恿張繼聰咬牙膠照出賽，結果老婆謝安琪即打去剷爆隊友。有一個護夫心切的老婆，張繼聰就算咬親條脷都依然sweet爆！
藝人張繼聰、方力申前晚與美國職業籃球員史達侯斯（Jerry Stackhouse）及美國花式入樽明星Easy J一同現身天水圍的慈善籃球賽，大前晚在球賽中咬傷脷要縫五針的阿聰表示，有馬上告訴當晚從內地工作完返港的太太謝安琪（Kay），而自己就漏夜去急症：「嗰晚我返咗屋企，諗起下星期有個杭州商演，之後就開始擔心，一點幾先開車去咗睇急症，醫生話乜玩到條脷咁，要快啲好就要聯針。」阿聰又大爆隊友教唆他咬牙膠上陣，Kay一知道即刻鬧爆隊友：「太太逐個打去鬧佢哋，仲話我夠膽落場就即刻幫我宣布退休！
疤痕好有型
仍有少少黐脷筋的阿聰直言最難捱是只能吃白粥醫肚，過一段時間就感到肚空空，但又話條脷「破相」好有型：「人哋條『蜈蚣』喺塊面度，我條『蜈蚣』就喺條脷度，成條火車軌型過穿脷環，都好嘅，以後有痱滋都冇感覺喇。」問到傷口會否妨礙與Kay濕吻？阿聰就甜笑話：「唔係吓吓都用脷o架嘛！」
而同場的小方雖然忙於找兒時偶像Jerry Stackhouse簽球衣，但都不忘關心隊友阿聰，問到小方有否試過打波受傷？他表示以前主力游水，所以在打籃球方面是錫身型：「以前主力游水唔能夠整親，臨落場教練都會話唔可以整親我，所以我由細到大都打『老細波』，所以一直都打得唔叻。」問到臨落場前女友鄧麗欣會否有愛心提示？他直言不會，而女友亦從沒有觀看過他打籃球。
文：音樂組