Yumi10蚊博1億 蕊蕊預告移民

乳模Yumi自從飛甩周秀娜舊愛陳偉成後即財源滾滾來，一星期密接5個騷，因此希望乘勝追擊買六合彩望中頭獎，她今次更是處女下海買六合彩，但只買10蚊一條飛咁大把，實行刀仔鋸大樹盼圓億萬富婆夢！

問Yumi如中了獎會如何分配彩金？她坦言：「首先我會助養兒童，試吓做未婚媽媽嘅感覺。之後就打算環遊世界，同「中國太空人」楊利偉一齊上太空。另外自己都好鍾意飲烈酒，所以開一間酒吧都唔錯！仲有，買番層樓自己同屋企人，就算唔自住，用嚟收租都得。」

希望刀仔鋸大樹的Yumi，只用了10元投注。

蕊蕊滿懷希望，盼中獎後環遊世界。

為增加中獎機會，Yumi今次做足功課：「聽人講上環嗰間投注站會旺啲，同埋間投注站喺斜路上面，有『錢向上流』嘅意思。」Yumi更自爆心水號碼：「因為我係9月24號生日，所以會買9同24，另外2號就係我由細到大嘅幸運號，所以都會買。」

另邊廂，「寫真女王」蕊蕊事業愛情兩得意，坦言自從與金剛拍拖以來不但帶旺自己的事業運，就連男友的抽獎運亦大增！昨日是蕊蕊31歲生日，她笑言自己會鴻運當頭，所以打算同金剛大包圍夾份買200蚊六合彩：「就算唔中都當做善事！」

搞炸雞連鎖店

如果一注獨得，蕊蕊揚言會同金剛一齊環遊世界之外，更暗示會加速婚期：「如果我同金剛中咗1億，就會打算移民台灣，搞番間炸雞連鎖店！」她透露8、9都是她的心水數字，因為她是9月8日生日。

Yumi心水冧巴：2 9 24

蕊蕊心水冧巴：1 8 9

文：專案組