Alan蠔番次 氹凸肚女友
將成為十億駙馬的樂隊Mr.主音布志綸（Alan），早前被爆年底迎娶富家女友Sally，據知婚期定於11月7日假四季酒店大排筵席宴親朋，婚禮支出預計超過百萬，將由Alan全包。二人日前拍拖到中環開餐，Sally體形明顯比之前圓潤不少，肚凸凸疑似有喜！
現年34歲的布志綸（Alan），與家住九龍塘三億獨立屋、「玩具富豪」陳明耀之女Sally拍拖四年，如今終修成正果，他亦已承認將於年底迎娶富家女友Sally，並會在港大排筵席。有指未來外父曾提議出錢搞婚禮，可是「骨氣王」Alan不想靠外家，為給女友有一個夢幻婚禮，他近年死慳死抵，節衣縮食揸殘車，儲定「彈藥」準備年尾婚禮。
據知，兩人婚期已定於今年11月7日，並於中環四季酒店大排筵席宴請親朋，婚禮支出預計超過100萬元，並將由Alan全包。
Sally身形明顯圓潤
好事近的Alan日前與未婚妻Sally現身中環一間餐廳晚膳，至晚上9時半，兩人醫肚後步出到附近街頭取車，只見穿連身短裙的Sally，腹部微微凸起，身形亦明顯比之前圓潤不少，疑似有喜！沿途Alan細心地拖住未婚妻邊行邊傾，他亦氹得Sally不時甜笑，女方又翹住Alan手臂並肩而行，表現甜蜜。
其後Alan當柴可夫駕車前往西環一間蠔吧，未幾見Alan拿着一袋外賣生蠔步出，然後齊齊返回男方於薄扶林的屋苑繼續開餐。其後本報就Sally疑似有喜一事向Alan求證，他透過唱片公司回應：「唔係有咗，只係Sally影完婚紗相，依家唔使Keep得咁緊要，所以近期先圓潤咗啲啫！」
文、攝：追蹤組