岑日珈放縱出擊溝仔
樂壇生力軍岑日珈（Angie）在新歌中唱活豪放女性一面，為吸引更多裙下之臣埋身，主動出擊勾引異性，可是現實中的她卻剛好相反，性格純過「純純兔」，所以性感底線只限露腰，不容有過界「腰」求！
「翻版趙薇」岑日珈（Angie）以唱跳女歌手姿態殺入樂壇，可是本身沒有舞蹈底子，毅然要闖入「舞」林，五勞七傷當然在所難免，她說：「開頭學跳舞真係有難度，自己啲筋好緊，所以有啲烏身動作會好痛。試過最傷一次係個膝頭損晒、流晒血，因為其中一個動作要仆落地上，就算有用護膝都會流血，但損晒都要繼續跳。」
新歌《小動作》講述一名剛甩拖的女仔，因深深不忿被拋棄，而放縱自己，拋眉弄眼引誘其他男士，她說：「要佢哋想得到又得唔到嘅感覺，但其實我現實中比較天真，諗嘢冇咁複雜，所以我去演繹呢首歌時都有啲困難。」
拍拖經驗少
今年20歲的Angie拍拖經驗不多，問到可會主動出擊反追男仔？她說：「我連講嘢都好怕醜，我係完全唔敢，加上我個樣唔講嘢比較惡，男仔都會驚咗我，覺得我好難溝通，但識落就覺得好傻。」自言純情的她走進這個娛樂圈花花世界，不少女星為求出位都會敢露敢剝，但她的性感底線卻只限腰腿：「露腰、露腳好啦，我都冇身材露，好多女仔比我好身材，都唔輪到我露啦。」
場地：Studiodanz舞館
服裝：Initial Fashion
文：音樂組