Killersoap追夢 北上搵聽眾
不經不覺樂隊Killersoap已成軍11年，期間不停參加比賽，在2008年贏得世界性大型樂隊比賽中國區冠軍，去年開始舉辦內地巡演，再加上近日主音陳樂基（Rocky）踩入內地節目《中國好聲音》第三季一鳴驚人，作為本土Band的他們坦言內地的確較多機會：「老實講香港已經好少人會畀錢買碟，我哋都係今日出碟，夜晚就有得Download，連我哋咁小眾嘅音樂都咁。所以我哋只能向有人用心聽、肯花錢嘅市場嘗試。」
面對近年中港矛盾愈趨激烈，Killersoap每次返內地巡演或比賽，都實被人標籤為「建制Band」，他們亦直言：「以前會唔開心，依家慣咗，特別係呢排Rocky上好聲音，我哋都特登睇啲comment，我哋Band仔嚟咋，不過習慣緊囉！」縱使音樂與政治扯上關係，但其實五子最渴望的，只是單純追求「音樂夢」。
攝：吳文聰
化妝、髮型、服裝：CY Yim