洪永城辣慶唐詩詠 慘遭孤立
藝人唐詩詠及洪永城於無綫新劇中分別飾演o靚模及宅男，更有激咀戲。當中「被迫」怕醜的永城大呻於拍攝期間被孤立，而詩詠則自爆若遇上浪漫下廚男就即嫁！
藝人唐詩詠及洪永城（Tony）於無綫新劇《載得有情人》中分別飾演「超齡o靚模」及「怕醜宅男」。詩詠大爆在劇中兩極化的他們因一夜情而撻着，更要狂熱激咀：「我哋喺劇中參加咗迷幻派對，我cosplay咗佢最鍾意嘅卡通人物，之後就要親密接觸。（尺度如何？）要激烈濕吻，我比較慢熱，要Tony教我點調情，好緊張同尷尬！」
詩詠又笑指Tony拍攝時經常被罰面壁思過，Tony大呻被孤立：「我份人本身好健談，但今次要飾演患人群恐懼症嘅宅男，初頭覺得好難捉摸。而其他人唔想我開工心情過分wild，所以成日唔同我講嘢，又叫我面壁冷靜。拍完啲朋友都話我變得陰沉咗。」
期待浪漫「下廚男」
問到劇中有何難忘場口？詩詠自爆被Tony於沙灘彈結他及浪漫獻唱的戲份所感動，但Tony卻自嘲唱歌難聽，他說：「我唱歌天分唔高，用幾星期練同一首歌，投入晒感情去唱，但都係唱得差！」問到有何浪漫經歷？詩詠笑稱最欣賞「下廚男」：「我初戀男友試過送訂婚戒指同玫瑰畀我，但當時年紀小而拒絕。（後悔？）冇，不過期待下個浪漫男出現！（浪漫定義？）如果將來有啱嘅男士為我下廚，我即刻嫁畀佢！」而Tony則自認不夠浪漫，但稱想搵短髮女友：「我要提升浪漫度。（擇偶條件？）短髮嘅爽朗女仔，最緊要鍾意去旅行！」
文：影視組