Cara G.享受忙碌 老公詐型

事業愛情兩得意的名模Cara G.，2011年與拍檔Melanie開設健康果汁生意，愈做愈起勁的Cara，最近更將新店移師位於中環、名店林立的IFC，雖然租金比之前足足貴三倍，但Cara與拍檔依然無有怕：「我哋生意唔錯，所以租金唔係問題，我睇中IFC多寫字樓，交通又方便，好多喺樓上返工嘅客一落嚟就可以買果汁飲。」而碰巧另一名模Amanda S.的餅店正正在Cara的果汁店旁，提到可有考慮玩Crossover搞Gimmick，Cara就笑言：「未諗住，因為我知佢新開張一定好忙，但肯定我哋會互相支持，好彩我哋賣唔同嘢，唔會有競爭。」

24小時唔夠用

作為毫無生意背景及經驗的Cara與拍檔，果汁店開了僅僅3年便賺大錢，不過隨之而來是每天承受很大壓力，加上Cara初為人母，又剛重新投入模特兒工作，一日24小時根本不夠用，她自己亦坦言尚在學習如何分配時間：「其實係幾辛苦，BB仲細、舖頭只係開咗幾星期、啱啱開始做番Model工作，係需要啲時間習慣，但我好鍾意忙嘅感覺，享受每一個挑戰。」

Cara笑言與拍檔Melanie從不鬧交，只在感氣餒時會相擁而哭。

初為人母的Cara被老公勸要放鬆！

對生意非常上心的Cara，就算返到屋企都不忘公事，令老公不時有微言：「我成日喺床都不停Check email，我老公就會叫我返到屋企唔好再理公事，放鬆啲，甚至會嗌我熄電話，但佢都百分百支持我嘅！」

文：專案組

攝：劉斌

場地：Genie Juicery@IFC