曹永廉林子善睇舖食大茶飯
兩位「老闆」曹永廉、林子善日前到北角新落成的商場睇舖，同行還有好友麥長青。見三人密密斟，阿廉及子善更不時互給意見。事後阿廉與子善坦言有興趣再搞食肆生意，各自與友人合資。
曹永廉、林子善除了拍劇外，都是茶餐廳老闆。阿廉與友人合資七位數字於觀塘開港式茶餐廳，子善則已是兩間茶餐廳的老闆，二人不時落場幫手，親力親為。之前阿廉透露希望與老友蕭正楠等開分店，以為只是初步計劃。不過日前本報拍得阿廉、子善與好友麥長青（麥包）現身北角一個新建的商場，相信二人計劃擴充茶餐廳生意。
互相畀意見
當日麥包帶阿廉、子善看了多個舖位，見阿廉與子善互相給意見，似乎甚感興趣。期間二人與麥包及地產經紀於餐廳坐低傾細節，之後更站於商場外指手畫腳密密斟。
抱觀望態度
記者事後分別致電阿廉及子善，二人坦言希望擴充生意，不過現時只是觀望態度。阿廉謂：「呢次專登約埋子善一齊睇。（合資搞茶餐廳？）睇吓先啫！我太太依家都有做BB用品、服裝生意，或者會同洪天明夫婦合作睇吓有冇得搞。不過頭先都睇中一個有露台嘅舖位，都適合開高檔cafe之類，再研究吓先。」林子善則謂：「到商場正式落成先再作考慮，即使今次開舖，都未必會做食肆，可能會搞時裝、小食等生意。自己九月中都會喺太古再開餐廳，又或者會同開茶餐廳嘅拍檔再搞其他生意。」
麥包受訪時坦言擔任商場推廣策劃總監，今次純粹帶阿廉及子善來睇舖，看看二人有否興趣。
文：影視組