張美妮三點式 齋益老公
張美妮與老公KK早前到布吉旅行，出發前兩公婆更專登選購靚靚泳衣，一向密實的美妮旅行時大解放，穿上三點式化身老公「私模」任影唔嬲，更笑言此行努力造人，希望早日成為母親。
張美妮與老公KK自去年年底結婚度蜜月後，二人一直各有各忙，甚少機會甜蜜旅行。日前美妮與老公到布吉享受二人世界，原本KK想與老婆去韓國shopping，但美妮反而提議想去悠閒、舒適的地方，結果最後選景色怡人的布吉。出發前，兩人買了不少旅行用品，老公更為她揀了兩件靚靚泳衣，充當老婆的私人攝影師，為她拍下不少靚相。
旅行努力造人
美妮開心地說：「本來老公想同我去韓國食吓嘢同shopping，不過今次我反而想去陽光與海灘嘅地方，又可以去按摩relax吓。我哋揀咗一個有私人泳池嘅Resort，臨出發前老公仲陪我去揀泳衣，嗰幾日我哋24小時黐埋一齊，好甜蜜。」
美妮的老公KK有學打鼓，得知布吉夜市不少酒吧有live band，二人每晚都會去聽歌，相當enjoy。美妮笑謂：「自從做咗人太太後，我都學曉大方，布吉好多鋼管舞女郎騷睇，有一晚我主動邀請老公一齊睇，反而佢話寧願聽live band好過。」不過此行亦有美中不足的地方，就是二人視為囝囝的愛犬叻叻沒有同行。她扁嘴地說：：「我諗住遲啲同佢攞番本護照，下次旅行帶埋佢去。」問此行有否努力造人？她笑謂：「哈哈！當然有，非常甜蜜，都有努力，呢樣一定會！」
文：影視組