沈震軒奸計得逞鬚實力
戲路廣闊的無綫藝員沈震軒（Sammy）入行以來演過情聖、蠱惑仔、戇男及警探等，他早前為新歌染髮留鬚，突然勁有佬味，似足碧咸及狼人曉積文！最近Sammy又為青春劇變回白淨小生，但他笑言自己毛髮旺盛，留鬚反而更舒服，他又說愛演奸角，因為可突破自己循規蹈矩的性格。
無綫藝員沈震軒曾扮演多個不同角色，每次都會花盡心思轉Look，曾試過染金毛、電髮、剷青及留二撇雞，務求讓造型貼近角色性格，增強說服力，亦令觀眾更有新鮮感。
早前Sammy為主打舞曲《親愛的》染髮及留鬚，突然勁有佬味，貌似碧咸、型男歌手Justin Timberlake及狼人曉積文的混合體！他說：「首歌係型格歐美感覺，所以想Man啲，如果話我似呢幾位外國型男，我梗係開心啦！其實我鍾意留鬚，鍾意原始啲嘅形象，唔係唔姿整，但有鬚舒服啲。我生鬚好快，一個下晝唔剃已生晒出嚟，要好乾淨反而仲麻煩！」
演勵志劇變白淨
不過，Sammy最近為藝術「犧牲」，因拍青春勵志劇《衝綫》變回白淨小生，蓄黑短髮兼冇鬚的他，被粉絲笑指當堂後生十年。
Sammy的粉絲層跟戲路一樣闊，經常演「溝女王」的他原來連婆婆也迷倒，他笑言早前行街時被一位婆婆拉住，並說：「我認得你！你成日做奸嘅！你真係好衰，但演得好好！」雖然被鬧衰人，但Sammy樂於繼續演奸角，並自爆愛壞的原因：「屋企人好注重禮儀，一錯就會打，我細個飲茶都唔敢周圍走，試過亂搞杯碟，爹哋叫我摸個熱嘅茶壺，熱到我即刻縮手，令我明白咩事都要顧後果，所以我真人係幾悶，反而演戲時我就有機會跳出框框。」
文：立影
攝：嚴偉國
場地：Le Paradis Restaurant ＆ Cafe