傅穎齋戒淨身 搣甩負能量
九月就踏入三十歲「熟女」之齡的傅穎，覺得女人三十一支花，希望在演戲方面可以作多嘗試，不再局限o靚妹仔角色，心境年輕的她，心態卻有着明顯改變，既報名學車，又突然轉食素，不想被負面情緒纏身。
快將三十歲的傅穎（Theresa），坦言自己不再是細路女，她說：「上年我拍嘅電影、電視劇，都仲搵我做九十後細路女角色，或者做人妹妹、女學生，喺各方面我都想話畀人聽我大個女啦，可以試下做啲唔同角色。」她坦言不怕老，亦不介意公開歲數，她說：「三字頭係事實，最緊要睇自己點保養，心境點啫，我仲覺得自己好後生嘅，尤其喺呢行，好多人年紀大，但睇落都唔覺，呢行嘅人都保持到年輕心態，女人三十一支花嘛！」
轉性報考車牌
Theresa表示女性到了某個年紀會開始想變，她說：「今年我有好多轉變，以前一直好抗拒去學車，之前我去報咗考車牌，學咗一段時間，未夠三十個鐘，本來排咗期六月去考，但因為拍劇停咗冇上堂練車，所以要延期考牌。」
除了準備考車牌，Theresa更突然戒肉食素，她說：「喺三月時睇到一篇報道，講所有動物喺臨死前，嗰啲仇恨、怨氣好犀利，突然間我唔想再食肉，因為聽講每一個人或動物臨死，如果唔係自然死，一定有好多負面情緒，嗰啲情緒係遍布全身，你再去食嗰啲肉，會帶到啲負面情緒畀自己。」平日她都比較愛吃蔬菜、炒年糕，加上她有跟健身教練做運動，也以蔬菜沙律、水果果腹，她說：「喺大陸拍戲，我請咗個助理幫我整午餐、晚餐，都幾方便，劇組都知我食素，都會照顧我。」
採訪：音樂組
攝影：劉智源
場地：紅磡都會海逸酒店