朱璇被抄牌 嫌法國冇靚仔
華姐冠軍朱璇早前趁放大假，與「大肚人妻」陳爽及其丈夫同遊歐洲，眾人由朝食到晚又歎靚酒又擦美食，兩女更盛裝扮公主參觀城堡。朱璇大爆獲數名法國男讚靚兼「抄牌」，但她卻笑謂：「法國都冇靚仔。」並揚言隨時「閃退」重返校園。
朱璇早前與好姊妹「大肚人妻」陳爽及其丈夫，遠赴歐洲廿日暢遊法國、西班牙巴塞隆拿等地，參觀畢加索故居、酒莊及凱旋門等景點。曾在法國巴黎留學的朱璇，身為「地膽」卻未有安排行程，一切交由陳爽老公處理，她笑道：「好彩有佢老公plan晒，我哋好懶，唔使用腦，乜都靠晒佢。」
扮公主參觀城堡
此行，她與陳爽優哉游哉，由朝到晚享受美酒佳餚：「我哋九點幾一醒就飲香檳、食ham，行到邊食到邊，不停飲紅酒、食小菜，搞到我肥咗成一個圈，自己都唔敢磅重，應該至少肥五磅。」由於陳爽當時有身孕，故去到酒莊只是齋睇冇得飲。今次兩女又盛裝打扮參觀多個城堡：「我同阿爽都特登着到好靚、好復古，覺得自己好似公主咁。」
問到在法國有否艷遇？她坦言獲數名法國男搭訕，並笑稱：「其實日日都有人搭訕，呢個係佢哋嘅文化，法國男仔好鍾意搭訕，無論行街、食飯都同你傾偈，仲讚我靚同留電話。（有靚仔？）法國冇靚仔o架，藝術型嘅通常都係阿伯，我鍾意後生仔，唔要不修邊幅。」朱璇又表示有回母校與好友見面，令她有重返校園的衝動，那麼會否「閃退」去讀書？她笑謂：「隨時有機會o架！好恨返去讀戲劇，見到啲師弟妹排戲，令我好懷念。」
文：影視組