黃愷傑唔靠父母闖影壇
趙雅芝幼子黃愷傑（Wesley）醉心演藝事業，不單有着父親黃錦燊及母親趙雅芝的先天優良遺傳，更憑着後天努力，完成北京電影學院（北影）表演系研究生課程，對演藝工作可謂充滿誠意。
「星二代」Wesley憶述童年時已對演藝工作產生好奇：「3、4歲已對動畫好好奇，大啲就迷上電影。喺南加州大學讀business，但讀完出社會工作，問自己係咪真係鍾意？結果我去咗北影追尋我嘅夢想，讀咗3年，期間好好彩，有劇組嚟學校選角，我有幸參與4部作品。（父母支持入行？）由細到大，父母都畀機會我獨立，教我要搵到自己興趣，咁先會熱情投入，無論我做business定演藝工作，佢哋都好支持。」
目標十年後執導
Wesley既有父母遺傳演藝細胞，又有紮實演藝知識作根基，他說：「我未入北影前係張白紙，學咗好多台前幕後知識，現時希望做好幕前工作，望再過十年可以做導演。做演員我冇規限自己路線，雖然之前拍嗰4部作品都有動作戲，但文藝戲我都想試。（想同父母同場演出？）未必，始終私生活同工作應該分開。」
與女友拍拖8年
Wesley又透露有位拍拖逾8年的圈外女友：「可能開始拍拖時，我哋已經係分隔兩地，好明白要畀心機同時間去建立信任，至可以維繫感情。其實每一行都有靚仔靚女，依家我入咗行，都唔會有大問題，專唔專一係睇性格。女友係做Fashion，可以用唔同角度畀意見我！」
文：影視組
攝：黎志輝
場地：Soi 18 Thai Cuisine