梁漢文床戰索女 老婆詐型
梁漢文（Edmond）事隔15年再度進軍大中華市場，在最新國語歌MV中床戰索女，上演「纏綿遊戲」，雖然在鏡頭前享盡艷福，但鏡頭後老婆Karen卻大興問罪之師，隨時要扭耳仔請罪。
自15年前推出過一張《蝴蝶來過這世界》國語專輯後，梁漢文（Edmond）一直為廣東樂壇默默耕耘，幾乎絕迹國語市場，眼見「人仔」愈來愈好搵，他決定再回到這個貌似熟悉，但其實陌生的戰場裏，推出最新國語碟《聽后感》，重新演繹不同天后的經典歌。
考慮進軍飲食界
Edmond說：「我為廣東歌都付出過好多汗水、時間、心血，都想為另一語言出力，依家係好機會，好想開拓更闊市場。（賺人仔？）呢個無可厚非，依家係必須要起步，對我嚟講可能真係遲咗少少。」Edmond今次出碟獲時裝老闆重金贊助，在微電影中飾演北上創業的他將會試盡靚衫，原來在現實中，他亦考慮開舖做老闆：「因為我鍾意香港美食，希望喺呢方面發展，有同朋友傾過吓。」
大玩「纏綿遊戲」
不過最意想不到的是，平時形象乖仔的Edmond為了拍攝新歌MV而豁出去，與索爆女主角玩「纏綿遊戲」，他說：「MV有床上戲，呢個床上戲我覺得都幾激，我好少做呢類情節，嚟緊要拍番多啲啦。」問到老婆林文慧（Karen）可有詐型？他笑言：「佢睇完之後，話認為呢個MV冇乜必要囉。（跪玻璃認錯？）未住，未住！」
文：音樂組
髮型：Moe＠Fifth
化妝：Hetty Kwong
場地：彌敦酒店