馬賽信佛渡難關冇諗過死
藝人馬賽自流出艷舞片後，昨日首度出席活動行騷，走出陰霾，雖然眼腫腫的她面帶笑容行騷，表現專業，但受訪時提到停工後的生活，即熱淚盈眶，強忍淚水，還說從沒有自殺念頭，果然堅強！
馬賽自上月23日流出艷舞片及照片後，一直「潛水」至昨日首度復工與藝人楊思琦、姚子羚為時裝品牌行騷，而湯寶如、關寶慧亦有出席。眼帶浮腫的馬賽滿面笑容打頭陣及壓軸行騷，不過受訪時她向傳媒合十道歉，多謝客戶沒有取消她的工作，但之後暫時沒有新job，待公司安排，會先讀課程自我增值。
唔可以傷害自己
問到停工後如何負擔個人生活時，馬賽即強忍淚水說：「呢大半年都係靠屋企人。（頒咗禁制令，係咪鬆一口氣？）我好感激律師團隊不眠不休咁去幫我做呢件事。（律師費自己畀？）屋企人幫我畀。」對於有指馬賽暫遷回內地居住，她指父母居於內地，都想多點時間陪他們。面對困境，馬賽勇於面對沒有產生自殺念頭，但直言好難捱：「最難捱嘅一星期，我冇聽同睇任何嘢，乜都唔諗，只知道無論發生咩事都唔可以傷害自己，因為仲有好多人疼錫同支持自己。」她因患有抑鬱，今年１月有看精神科醫生，現服藥幫助平復情緒。
說佛偈等因果
舊愛汪子琦指她傳艷舞片給圈中年過半百的男藝人，馬賽再度否認，指已交警方及香港個人私隱專員公署調查，她不敢看任何報道：「一段錯誤嘅感情去到一個咁災難性同毀滅性嘅結果，係要自己去承擔，最sorry係令一班錫我嘅人擔心。（有冇恨汪子琦、Laura及後悔？）自己得到個好大嘅教訓，半年前我信咗佛，相信好多嘢都要認命，依家唯一係做好自己同面對。」對於汪子琦指是她主動跳艷舞，馬賽說不作回應：「我信佛，『萬法皆空，因果不空』，好多嘢唔使去尋求結果同答案，因果會畀到答案。」
最後馬賽再三強調交友要有戒心，多聽家人意見，她因不理家人反對發展這段感情，全因任性及自以為是：「依家好感激一班仲咁支持我嘅人。」活動後她即上車回家。
文：名人組