霆鋒廚神起鑊 蘇濠冧女
「新一代型男廚神」謝霆鋒與經理人霍汶希（Mani）一同現身澳門新濠天地，為全新潮蒲點「蘇濠」進行開幕禮，更即場開爐起鑊，炮製「蘇濠撈起」，寓意「蘇濠」掀起澳門至潮蒲文化。霆鋒更即場餵粉絲試吃及大玩自拍，難怪Mani笑指現時的霆鋒更加受女士歡迎呢！
澳門新濠天地驚喜連連，繼推出華麗聲色匯演「TABOO色惑」後，昨日又呈獻全新時尚「潮蒲點」─「蘇濠」。為隆重其事，特別邀得「新一代型男廚神」謝霆鋒、經理人霍汶希（Mani）及國際著名街頭藝術家D*Face一同為「蘇濠」揭開序幕。霆鋒和Mani進行「開爐起鑊」儀式，而近日被封為「國民廚師」的霆鋒還即場大顯身手，與Mani齊齊炮製「蘇濠撈起」，Mani親到台下揀選兩位粉絲，讓霆鋒餵她們試吃兼玩自拍，大搞氣氛！大會特別安排10位廚師製作美食，霆鋒和Mani即場品嘗燒鵝髀和海南雞，大讚美味可口。
謀搞鋒味廚房
霆鋒受訪時表示十分喜歡澳門，尤其欣賞這裏的美食如豬扒包和葡撻，他透露計劃在東南亞開設「鋒味廚房」，首選更是澳門，而早前他亦曾在澳門拍攝《十二道鋒味》，除了在新濠天地的餐廳品嘗了不少高級美食，令他回味無窮外，更潛入《水舞間》進行水底拍攝，十分難忘，所以當邀請出席今次活動時，二話不說就答應，他又謂或會開拍第二季《十二道鋒味》。問到是否愛上烹飪？他說：「已經成為一種習慣，會鑽研，變成咗嗜好。（以前女友都試過你手勢？）我好多朋友都試過，但以前冇煮得咁密。」問他是否想發展飲食王國？他笑說：「唔知點講。（想攀登演藝另一新天地？）希望啦！」
下廚增親和力
此外，談到舊愛王菲早前生日，他上載電影《一生一世》的主題曲被指憑歌寄意？霆鋒說：「係Mani整上網o架。（網民想你哋復合？）唔講呢啲。」父親謝賢在節目中表示看到他跟孫仔分開時會感觸落淚？霆鋒說：「大家好少見到我爸爸咁感觸，佢覺得我同佢一樣早入行早結婚，驚我辛苦啫，不過我冇乜嘢！」他又指會帶兩名兒子來澳門新濠天地。
作為《鋒味》監製的Mani被問到是否有意跟霆鋒開「鋒味廚房」？她笑說：「楊生（楊受成）話會無限量支持佢，但唔知有冇預我？如果預咁我下半世靠晒佢。（霆鋒話問你？）霆鋒除咗係老闆，仲係演員同歌手，未必有咁多時間，佢個人一係唔做，一做要做到最好，佢本來話都係唔好，但後來有啲動搖，因為佢真係好鍾意煮，佢每次煮完一道菜會望你個表情，想知好唔好味，但佢係唔會食，只係享受煮嘅過程，其實容祖兒、阿Sa（蔡卓妍）都話依家嘅霆鋒更受女人歡迎，覺得佢開朗咗，終於搵到釋放壓力嘅方法！」
Mani笑謂以前大家看到霆鋒會彈開，但現在霆鋒和善不少，很多人埋身，反而要多請保鏢護駕，問是否多了異性埋身？她說：「佢不嬲都多女埋身，最重要佢依家更識得關心人，又有責任感同肯承擔，同埋原來識煮嘢真係會加好多分。」至於會否拍攝《鋒味》第二季？Mani指要待霆鋒還完片債及廣告債才商討。
文：名人組