李詩韻甜到漏 狂讚新歡叻

李詩韻、馬國明（馬明）和王君馨等昨日在馬鞍山，為無綫劇集《寒山潛龍》宣傳，期間大會安排小朋友cosplay成劇中演員，馬明在台上與「小馬明」玩到碌地，更讓扮演「小李詩韻」的小朋友狂敲其額頭！羅敏莊亦帶同囡囡為老公陳國邦撐場。

李詩韻自日前被影到翹實西裝男夜遊中環，之後在微博公開戀情後，她昨日受訪時甜蜜接受記者祝福，又大讚男友叻仔：「我第一次咁公開承認，因為唔想畀人亂寫。我男友喺美國創業，幾叻仔，對我好好，係個好男仔！不過佢好少喺香港，佢係圈外人會好大壓力，我哋啱啱開始，希望大家畀空間我哋。」

李詩韻日前被影到與西裝男新歡夜遊中環。（資料圖片）

王君馨一身短裙獻唱劇集插曲。

直認結婚對象

問怎樣稱呼其男友？詩韻說：「叫佢『好男人』啦，係朋友介紹識，希望順順利利！」她又直認視男友為結婚對象：「有潛質o架。（異地戀？）未必係壞事，佢喺外國唔使咁大壓力！（撞正拍拖嚇親佢？）希望大家唔好騷擾我另一半。」

問詩韻的緋聞男友馬明有否失望？他說：「冇失望同心酸。（少咗個筍盤對象？）無綫同出面都大把筍盤女仔！」他又自爆「發力」追女仔：「發緊力啦，有朋友介紹朋友畀我識。（合眼緣？）有，未見過面。（淨睇相？）會一班人食飯！」

同場的王君馨一身短裙唱劇集插曲，問到有男友的她見到現場可愛的小朋友，會否有想生B的衝動？她稱婚後會以老公為先：「會顧掂自己，跟住照顧老公，之後先係好媽媽！」

文：影視組