林峯金剛貼身服侍 齊做阿四

無綫當紅小生林峯與吳千語相戀以來，出雙入對，愛得癡纏。近期常離港工作的林峯，昨日就抽空陪女友到中環超市買餸。約下午4時，戴帽及黑超的林峯，與同樣戴住黑超的千語BB現身超市，甫進店內，林峯就「自動波」推住購物車四處選購，兩人睇完零食、又睇調味料等，不一會已揀選大堆食品。

撒嬌得米冇怨言

期間行經乾糧貨架時，千語BB睇中貨架底層食品，林峯二話不說便踎低揀，而千語BB則從旁指指點點，之後搭下男友膊頭撒嬌，就氹得林峯笑到四萬咁口。其後兩人又去廚具部，最後買了即食麵、杯麵、餅乾、調味料等兩大籃貨品往排隊付款，林峯當然負責埋單，更做埋阿四攞戰利品，然後搭升降機往停車場取車。兩人見到記者拍照，即笑笑口示好，而手揈揈的千語BB臨走前還向記者揮手道別。

金剛和蕊蕊齊齊踎地揀食物，不分你我。

貴為男神的林峯踎低為千語ＢＢ揀食品，又有咩所謂？

齊齊踎地揀不停

另外，早排忙寫真大戰的蕊蕊，日前終於有時間陪男友金剛逛西九一商場超市。身穿短褲的蕊蕊和金剛一齊揀完奶製品，再揀公仔麵。早前被公開性騷擾的蕊蕊，當日有男友相伴即放心踎地揀不停，而頸後貼住膠布的金剛則寸步不離貼身保護。付款後，金剛還做埋苦力拿戰利品，齊齊上車返家玩煮飯仔。

自被性騷擾事件後，金剛貼身保護蕊蕊。

金剛做埋苦力拿戰利品，係好男友常識吧。

文、攝：追蹤組