Chilam「百萬」火急 名車氹靚靚
張智霖（Chilam）出席《衝上雲霄》電影版記者會，談到老婆袁詠儀（靚靚）不欲他與佘詩曼結片緣，即急忙護妻讚靚靚溫柔，活動上與阿佘合照亦表現避忌。據悉，他有意再購入過百萬的名車氹老婆，名副其實的「愛妻號」。
張智霖、吳鎮宇及古天樂昨齊齊以機師造型出席《衝》片記者會，三大型男chok爆登場，尖叫聲不絕，更不斷有女生要求合照。前晚剛慶祝完農曆生日的Chilam，被發現撇低經理人及助手等獨自駕駛市值逾百萬的瑪莎拉蒂、白色Ghibli系列靚車到場，認真富貴，事後他接受電話訪問笑說：「我半年前同呢間車廠合作過，佢哋咪畀我用吓囉，依家真係覺得入（市）得過。」有指一向是「愛妻號」的他，計劃「名車贈美人」，靚靚對這份神秘大禮應會驚喜非常。
古仔露前露後
Chilam昨與有份參演《衝》片的前緋聞女友佘詩曼同場，大合照時二人表現陌生，但台下亦有寒暄。談到外傳靚靚下令他不可與阿佘演對手戲，Chilam笑答：「我哋嘅另一半，躺着也中槍。咁講對佢好唔公平，有啲咩變化，就搞到佢好似好霸道咁，佢其實都有溫柔嘅一面。（介意同阿佘合作？）絕、絕、絕對唔會。」鎮宇在旁搞笑謂：「我匿喺枱底聽到啲高層講，話佢哋唔需要呢啲宣傳，所以唔想佢兩個合作。」戲中與台灣女神郭采潔被配成一對，Chilam稱未知親熱程度，鎮宇打趣道：「有冇得錫女主角，要睇吓演員乖唔乖。」Chilam回應：「我都好乖，希望加戲。」鎮宇澄清未打算父子檔合演內地電視劇，問到《爸爸去哪兒》第二季是否令他工作量增多？他說：「就算係都要後年先接到，之前嘅檔期已經排滿。」
扮演航空公司老闆的古仔與阿佘發展感情線，稍後還被安排於英國古老大屋內取景。問阿佘性感程度會否更勝電視版的陳法拉？古仔擋駕說：「咁我大露背嘞，露埋前都得……不過要着褲。」阿佘又稱沒聽聞跟Chilam有對手戲。
文：影視組