關禮傑索女起舞胸贏王敏奕
藝人關禮傑靚女千金關楓馨昨日出席處女活動，身穿低胸小背心及熱褲的她在鬧巿大跳勁舞，非常養眼，同場露小蠻腰的王敏奕也不及她搶鏡。她稱酬勞是開心價，志在取經驗，但就否認有意鋪路入行，堅稱暫時以學業為重。
關禮傑女兒關楓馨（Fabienne）與藝人王敏奕（Venus）及其師弟Playtime昨日為宣傳瑞士天梭表舉行的「第17屆仁川亞運倒數50日快閃活動」，率領40名舞蹈員在尖沙咀街頭大跳勁舞，首次出席公開活動的Fabienne以低胸小背心襯熱褲，搶晒只露小蠻腰的Venus鏡。而Fabienne的媽咪更到場為女兒打氣，並讚女兒跳得好，值90分。
關禮傑電話打氣
Fabienne表示剛由英國放暑假返港，問她是否有意入娛樂圈？她否認；「讀完書先諗，依家專注學業，今次只係當攞經驗，接job問准父母，係爹哋嘅經理人幫我接。」她稱之前在家中練習跳舞時，父親有看過：「活動前都有打電話同我打氣，不過，佢今日有嘢做嚟唔到。」有傳她今次出席活動的酬勞高達五萬，媲美無綫小花岑麗香？她故作神秘說：「係秘密，係開心價，我只係攞經驗，唔係計錢。（會唔會請父母食飯？）當然會，當係做暑期工咁。（暫時手上有冇接到其他工作？）睇下有冇機會。（對娛樂圈有冇興趣？）冇諗過呢啲嘢，我仲有兩年先大學畢業，9月就會返英國。（妹妹會唔會入行﹖）佢太細，今年先13歲。（身為星二代怕唔怕性感相外流﹖）我嘅社交網站只係同朋友分享，而且有私隱設定。」
Venus接拍賀歲片
至於Venus則透露今天將起程赴馬來西亞一個月拍攝電影，她說：「係一部賀歲片。（男友曾國祥爹哋曾志偉做導演？）唔係，係新加坡電影公司，得兩個香港演員。（搭馬航？）唔係，因為公司怕敏感，所以安排搭其他航空公司。」問到男友會否探班時，她含蓄地說：「我聽講馬六甲好靚，睇吓有冇人有興趣嚟。」
文：名人組