千嬅做衰人 兇掂五童星
靚媽楊千嬅與古天樂（古仔）昨日為新片宣傳，演校長的千嬅自爆做「衰人」，笑稱會罰戲中的小朋友，藉以「降服」他們。事實上，對童星非常照顧的千嬅，認為媽媽湊幾個細路好偉大，問會否追多個？她卻說：「諗吓先。」古仔則自稱經常被小朋友恰。
楊千嬅昨日偕古天樂、姜皓文、吳耀漢及劉玉翠等，在荃灣出席寰宇新片《五個小孩的校長》的「學校開放日」，期間片方安排五位小演員唱《小太陽》。之後古仔向小演員派雪糕以示獎勵，古仔見小朋友食得論盡，即展現父愛替她們抹手抹面。
演校長的千嬅自言鏡頭外要幫手照顧童星，更要繼續扮「衰人」：「佢哋覺得我係校長，有時問我係咪明星，我話我教書o架，邊個唔記得對白，我就叫佢上樓梯企一分鐘，佢哋堅驚，不過佢哋好乖、好醒目。」不過千嬅自言試過NG，反被童星取笑。
怕囝囝呷醋
問湊五個小孩會否被嚇怕？千嬅謂：「唔會，我覺得生咁多個好偉大，仲要好用心力湊。（追多個？）諗吓先，我呆晒！」她笑言曾教囝囝唱《小太陽》，卻被冷落，她想帶囝囝出席劇組飯局，介紹五位姐姐給兒子認識，但擔心囝囝見她湊其他小朋友會呷醋。
古仔透露該片擁有史以來最多幕後員工：「一個副導湊一個細路，我就冇份湊。」他直言從400位試鏡小朋友中選出10人，經訓練後再篩選出5名，「捨棄」過程甚痛苦。戲中與童星甚少交流的古仔，問有否耐性對細路？他笑道：「小朋友通常恰我，呢五個之前未見過，一見到我就嘻哈大笑，我好怕鬧細路仔。（恨生B？）呢啲係兩件事，（實習吓先？）實習咗好耐，我親戚好多細路，不過五個一齊湊就未試過。」
文：影視組