秋生梟雄本色：再亂噏告誹謗
黃秋生拍攝無綫重頭劇《梟雄》不斷傳出是非，對劇本、戲服、甚至外景酒店也有要求，經時間磨合，秋生對新劇製作也大致滿意，笑言若拍攝時有「四仔」（四號攝影機）就更完美！他又否認不滿馬國明的演技，強調大家未曾同場，更不排除告亂噏者誹謗！
黃秋生、黎耀祥、湯鎮業、馬國明、胡杏兒等昨日在將軍澳電視城為無綫重頭劇《梟雄》拜神，秋生稱拍攝順利，9月將會到上海拍攝，唯一美中不足是拍攝時欠「四仔」，他說：「有時開工冇咗部『四仔』（四號攝影機），話借咗畀隔籬廠喎，都影響咗個進度，有埋部『四仔』同埋啲木冇蚤就完美喇。」
秋生被指不滿飾演他少年版的馬國明演技，並對劇本、戲服及外景酒店有意見，秋生否認說：「黐線，都冇同佢同場，你估教仔咩！啲戲服都唔知幾靚，我想攞返屋企着，亂咁噏，不負責任！再噏多啲，下次畀人告誹謗，我試過告人，人哋要賠60萬畀我。」馬國明也稱沒有被秋生鬧過，皆因他們跟本不同場，他說：「如果前輩批評我都受得起，最怕佢話我到頂，已經唔會有進步，所以唔會有hard feeling。」
黎耀祥撐相處愉快
黎耀祥講到與秋生合作也覺得開心，大家相處愉快，他說：「合作好舒服，大家又有共同話題傾吓去邊度食嘢，啲人話佢脾氣差，其實佢都唔知幾好相與，大家有商有量，只係大家對佢有好多誤解。」杏兒坦言最初與秋生合作也是戰戰兢兢，但實際並非如此，講到她在網上留言撐馬賽，卻惹來富婆Laura追擊，她說：「我只係講作為朋友、一個女仔、一個人應該講嘅嘢，唔想再講其他。」
採訪：影視組