馬國明李詩韻死火難燃

馬國明及李詩韻這對金童玉女一直合作無間,先後在多套劇集扮演情侶,而最近更在無綫劇《寒山潛龍》再續前緣,雖然火花不斷,戲裏戲外都話題多多,但兩人都異口同聲強調從未過電,又指不心急拍拖,更在訪問中互爆不少秘密!

一見鍾情

在《寒山潛龍》再度合作的馬明及詩韻已經五度做螢幕情侶,早在2004年時拍攝無綫劇《本草藥王》正式合作,原來首次邂逅雙方已經有好印象,詩韻更大爆馬明幾度「愛上」自己!

馬:開頭覺得佢好靚女囉,同埋嬌小玲瓏,我鍾意啲細細粒嘅女仔。我覺得佢好適合拍古裝,唔係話佢時裝唔靚呀吓。

李:佢嗰時就冇依家咁口花花,好靜,但佢係一個好熱心工作嘅男仔。我第一日識佢已經覺得佢好捱得。依家就開朗咗,識得講笑,就撩吓女仔、攬吓男仔。

馬:你依家都分別好大,依家好戲好多,好畀心機去諗套劇點樣出嚟會好啲。有時幫我諗埋嘢,變咗我唔使諗咁多嘢。

李:第一套古裝嗰時佢同我講佢好鍾意我個角色,今時今日《寒山潛龍》佢又話愛上咗我個角色!

馬:佢好多角色我都好鍾意,《鐵馬尋橋》嗰個我又好鍾意!

李:但現實就撻唔着,不過撻唔撻得着都係要睇吓timing,你可以識個人十年都撻唔着,但無端端撻得着。

馬:可能大家都唔係好急搵另一半,就冇令件事發生。

口花撩咀

貴為一線小生的馬明出名口花花,但詩韻就對於「日日求咀戲」見怪不怪,馬明則反指詩韻講過唔算數,兩人互數對方「吹水唔抹嘴」。

李:佢套套都話要加咀戲,我都慣咗呢樣嘢,我唔覺得係咩一回事。

馬:加到咪加囉!

李:佢同導演講「呢場要咀」,我聽咗呢句對白幾百次,已經冇晒反應。

馬:我諗我係《鐵馬尋橋》嗰時變成咁,因為之前畀羅嘉良點醒咗,佢話一個男主角要令拍攝嘅環境開心。

李:所以你做咗一線小生就口花花嘞!

馬:我唔係淨係對後生靚女口花花嘅,我對住GiGi姐(黃淑儀)都口花花。

李:唔止係前輩級人馬,佢對住服裝、化妝、梳頭都係咁口花!

馬:你夠話介紹女仔畀我識啦,得個講字。

李:你諗吓點樣同佢撻着吖?我淨係搵佢話有個單身女仔好鍾意佢,叫佢識吓個女仔,但後尾都冇出過嚟。

馬:佢依家都有男朋友啦,不過你都好多friend,有機會嘅話再介紹吓啦!我都想介紹男仔畀佢識,但係我識嘅好多都結咗婚,一係就拍緊拖。

合拍談情

目前專注事業的馬明和詩韻,決心將感情放埋一邊,但其實對未來對象亦充滿幻想,馬明想女友為他打點一切,而詩韻就不介意幫男友計劃將來,難道暗示早前的「五年之約」所言非虛?

馬:我好驚煩,最好女朋友幫我搞掂晒。

李:係唔係着咩衫都幫你諗埋先?

馬:係呀,食乜飯都要諗埋,我淨係畀心機搵錢畀佢使就得,但詩韻就一定頂唔順。

李:唔係喎,我一定要organize嘅,我去旅行都做定晒資料搜集,所以個男仔要我幫佢plan,我都唔介意。

馬:咁我都有plan嘅,但要我日日諗去唔同餐廳食飯就有難度囉,諗落我真係幾冇情趣。

嫌棄筍盤

在「筍盤榜」名列前茅的馬明一直都是女性朝思暮想的對象,事業有成之餘又孝順父母,但在詩韻眼中卻未達滿分,更直言跟馬明好難撻得着!

李:佢梗係一個筍盤啦!

馬:咁TVB都好多筍盤嘅,係單身嘅都係筍盤。

李:不過我同工作上識嘅男仔好難撻得着,我好focus工作,冇咩機會好深入認識,馬明又難約。但當佢係對象我會畀90分,佢太靜態喇,我鍾意做刺激嘢。

馬:我就畀夠100分詩韻嘞,佢好有古典美又顧家!

李:係咪即係你鍾意古人同恐龍?

後記:百分百啱Feel

馬明和詩韻雖然撻極都撻唔着,但非常合拍,加上近日四出宣傳,攝影師未開口就自動埋位,又互相執好對方甫士。問到是否想再次合作?兩人都爭住答「想」,形容他們是公仔箱裏最襯螢幕情侶亦不為過。

馬:馬國明 

李:李詩韻

筆錄:宇翔 

攝影:嚴偉國

馬國明服裝:Sandro

李詩韻

服裝:Bread & Butter

髮型:Jay@Hair