蕊蕊受驚鳥 金剛扯火：性騷擾
性感女歌手蕊蕊昨日為猛男騷任嘉賓，大會安排三位澳洲猛男對着蕊蕊跳貼身脫衣舞，期間她被迫伸手摸猛男下體，又有猛男喪聞其敏感部位，嚇得蕊蕊花容失色兼標汗！事後，蕊蕊表示感覺被侵犯，蕊蕊男友金剛則躁爆說：「咁直情係性騷擾啦！」
早前推出寫真的蕊蕊昨日與趙勁皓（King）在深水埗出席《雷霆猛男SHOW發布會》，大會邀得澳洲猛男組合THUNDER FROM DOWN UNDER三位成員到場。三名大隻佬率先跳脫衣舞，他們除脫去小背心大騷「豪大雞胸」及「朱古力腹肌」，更走到台下又啜又抱女士，並坐在女士大髀兼摸面。
露出痛苦表情
不過，獲邀任嘉賓的蕊蕊就遇上「大災難」！穿低胸裙的蕊蕊，獲安排坐在台上，「享受」三位猛男在她身邊表演跳辣身舞，期間猛男們輪流向蕊蕊獻技，第一位先捉實蕊蕊小手「搓his breast（胸部）」，第二位突然用頭撲向蕊蕊下體喪聞，嚇得她立即瞇眼兼推開猛男。到尾聲，一位「長髮大力士」將行動升級，他將蕊蕊玉手硬塞到其褲內，蕊蕊見狀即縮手，猛男再極速捉回蕊蕊的手，然後將蕊蕊的手從上而下摸落去，最終觸及猛男敏感部位，蕊蕊只能露出痛苦表情。
大合照時，獲猛男抱起的蕊蕊又露出打底褲，最後King抱起她時，她更請King面部食「波餅」，可謂多災多難。
事後蕊蕊受訪時猶有餘悸驚呼：「好驚，唔知發生咩事，之前以為佢哋只喺我側邊跳。（咩感覺？）嚇親囉，好想走，我未試過。」提到觸及猛男重要部位，嚇到花容失色的她表示不知情：「我唔知摸到乜，好驚，好想縮手，但畀佢捉住咗，佢哋好大力，我嚇死，幾想走呀！」談到又被聞敏感部位，蕊蕊激動說：「係呀！幾想縮呀，我已經推開佢，但佢哋又大隻又大力。」問是否覺被侵犯？她強顏歡笑道：「有少少，但可能係表演嘅一種，我未有心理準備。」
再問蕊蕊會否擔心男友金剛睇到眼火爆？她坦言稍後會向金剛報告：「佢應該唔會眼火爆，因為我係受驚，唔係享受。」記者笑問看金剛跳辣身舞會否較興奮？她笑謂：「仲驚！（鍾意邊個多啲？）金剛好啲，我鍾意啲保守啲、斯文啲，金剛斯文好多！」
「唔可以亂嚟」
金剛昨接受電話訪問時，得知女友「出事」難掩不快心情，直言蕊蕊事後即致電訴苦，言語間相當不開心：「佢話畀人非禮性騷擾，咁無喇喇畀人摸同抽水，咁直情係性騷擾啦！」問會否報警？金剛坦言會先了解事件，雖明白今次是為工作，但亦替蕊蕊感不值：「工作以外都唔可以亂嚟，相信佢會交畀公司處理，有法律規則㗎！唔係猛男就點都得，我夠係猛男，但唔會咁做！」問金剛以後會否到蕊蕊工作場地監場？他無奈謂：「今次件事發生咗都冇法，唔通告佢咩？（你同蕊蕊拍拖後，情慾戲都唔接，會唔會要求女友為你改變？）睇佢自己，我唔會詐型，因為了解呢行工作需要。」身處新加坡的蕊蕊經理人漢洋表示：「作為經理人係要保護旗下藝人，但我唔喺香港，要先搵負責同事了解。」
文：影視組