周柏豪偷跳傘公司照肺
周柏豪之前到澳洲為新碟拍攝封套及MV，柏豪自爆斗膽瞞住老闆、父母偷玩Skydiving（跳傘），希望30歲前可以在紅館開唱及玩Skydiving（跳傘），柏豪笑說：「起程前問咗老闆，佢話唔畀玩，因為怕萬一有咩事，但我一上機已經諗定先斬後奏，去到說服同事同我去玩，當然之後畀老闆鬧爆，仲嬲咗我，話做完演唱會先同我計，可能扣晒我啲工資。」
上飛機想縮沙
有畏高的柏豪最愛挑戰自己，在玩跳傘前他要簽下生死狀，他笑說：「簽紙時我諗緊張過將來簽結婚證書。」柏豪坦言登上飛機後想縮沙，他笑說：「梗係想，但冇得返轉頭，說服咗班同事陪我去玩，唔玩咪好衰仔。」遭公司責罵的柏豪表示理解，因為九月紅館夢想成真，兩場門票開賣兩日就售罄，如果有甚麼意外，他不知怎樣同大家交代，他說：「因為開演唱會唔係我一個人嘅事，唔可以咁唔負責，萬一我有啲乜事，整斷腳、手或者心臟病，影響到演唱會就唔好，公司遇到我呢隻猴子，都畀我激親。」
柏豪形容跳傘玩意非常刺激，在半空中他發覺人好渺小，他說：「唔會再睇得咁緊張，唔會再執着。」今次成功挑戰自己，克服了畏高心態，正積極為紅館個唱秘密練兵的他說：「到時有一項難度表演，雖然未有十足信心，但我會再努力。」
文：音樂組