「雙K」寫真戰領先送唇印報答
今年攜手出處女寫真的日模清穗久美子（Kumiko）及韓模金愛妍（Kim），寫真首天開賣銷量已破萬，撼抵本地o靚模，昨日兩人舉行祝捷會，慶祝贏開巷，雙K計劃送唇印給粉絲以答謝支持，而雙K更獲公司老闆娘之一Mandy Lieu豪請歐遊作獎勵。
名模Mandy Lieu旗下日模清穗久美子及韓模金愛妍，今年首次加入書展寫真戰團，首天銷量已過萬，成為寫真集銷量之冠，出版商還要即晚加印萬本應急，兩人昨日舉行銷量破萬慶祝會。
對於銷售理想，雙K坦言感到十分開心，至於寫真贏o靚模成條街，雙K打趣表示冇一條街咁長，只能算是巷，Kumiko說：「我以呢本寫真為傲，拍攝嗰時大家都好辛苦，又落雨，但大家發揮團隊精神，啲相影得好靚，有好多人對我哋本寫真有興趣。（想唔想再出第二本﹖）當然想。」
颱風延誤趕不及回港
而身在廣州的Mandy原定出席是次慶功，但因颱風關係令航班延遲，未能及時返港。不過，Mandy已承諾會請雙K遊埠獎勵，Kumiko開心地說：「我想去日本沖繩，Kim想去韓國濟州。（Mandy話請你哋去歐洲喎！）我都想去歐洲呀，匈牙利好靚，又多教堂，我係基督徒，好想去睇吓。最好Mandy包埋瘋狂購物同美食。」
而雙K有意準備神秘晚餐答謝Mandy，至於如何答謝粉絲支持？Kumiko希望再搞簽名會：「因為上次簽名會太多人，所以簽唔晒，我已買定支簽名筆隨身攜帶，可以隨時幫粉絲簽名。（不如送香吻﹖）錫喺邊﹖（塊臉。）唔得，合約唔畀。我可以將唇印錫喺本書度，已經有4個人要求我咁做喇！」
文：名人組