祖兒催掂古巨基成親 再送多仔佛
容祖兒昨出席置地公司「香港製造」紙糊熊貓展覽開幕儀式，最愛Miffy公仔的祖兒笑言要整crossover版：「油Miffy嘅顏色，再加個交叉嘴，如果我畫功好啲，有諗過整個青花瓷器熊貓，代表中國香港。」
講到老友古巨基跟助手Lorraine結婚，原來祖兒一直在背後發功：「呢兩年喺後面推波助瀾，不斷問幾時啫，你知佢又好神秘。」她又讚基仔浪漫：「佢幾有心思，見Lorraine全部嘢都唔知，拍咗咁耐拖都仲咁有心思！」祖兒指基仔曾私下向她說今年未必會擺酒：「佢都話今年忙，應該下年。如果佢聽日擺酒，相信我哋成間公司會停工一日。」祖兒再催基仔生B：「想送啲催生嘅禮物，可能送多仔佛畀Lorraine。」談到自己，祖兒不急於做人妻：「基仔都拍咗咁耐先結婚，我可以畀多少少時間觀察。（使唔使廿年？）廿年，仲結嚟做乜！幾年囉。」問是否認定劉浩龍為結婚對象？她笑言：「唔好講到咁定好喎。」
基仔遭冒認
另外，有網友搞「屎」棍為新婚的基仔「贈興」，一周前有人冒充他開Instagram帳戶，並大量上載個人相扮基仔，吸引包括鍾舒漫等近五千粉絲「追蹤」。該網友被揭發後，昨晨刪去所有相，並上載一張大便照，留言鬧爆基仔的粉絲。
文：音樂組