安仔游走忠奸 掙扎求存
無綫新劇《忠奸人》集合了監製王心慰口中的三位好戲之人－郭晉安、吳卓羲及張繼聰，三人在劇中均有令人耳目一新的演出。安仔飾演的律師因被吳卓羲誤傷而要坐輪椅，吳卓羲內疚之餘，安仔亦為爭取失去的機會而在「忠」、「奸」之中求存，深信觀眾會有新鮮感！
郭晉安、田蕊妮、吳卓羲及張繼聰等演出的無綫新劇《忠奸人》，將於下周一（14號）晚上九時三十分首播，監製王心慰（Amy）點名讚揚劇中多位演員的精湛演出，令該劇生色不少，她說：「今次呢個劇有三大特點：演員好戲、情節吸引同埋個劇有內涵，我係因應每個角色去搵適合嘅演員！」
郭晉安繼劇集《與敵同行》後再演「奸」角，Amy說：「郭晉安幾乎全劇都係坐住輪椅演出，其實拍完《與敵同行》後，好多觀眾都想我哋開續集，今次我安排佢坐輪椅演出，因為《與》嘅尾段劇情講安仔癱咗，我一直有個諗法：一個因為意外而要坐輪椅嘅人物，佢比其他人失去好多機會，佢為生存於是做咗好多嘢，究竟其他人會界定佢係忠定奸？安仔嘅演出好精彩，一來係佢本身好戲，二來喺開拍前佢探訪咗好多傷健人士，佢演呢個『輪椅大狀』效果好逼真！」
張繼聰入獄失戀
郭晉安演的律師（司法界代表），正是被吳卓羲飾演的警察（執法者）所誤傷而致殘，Amy說：「吳卓羲雖然演過好多次警察，但呢次佢演嘅同以往好唔同，佢演一個出生小康之家，心態正面嘅警察，是非觀念好重，佢對郭晉安好內疚，但內疚呢種情緒係最冇用。佢面對住社會呢個大染缸，警察都係人，人總會遇到好多矛盾，佢點樣把持得住？抑或同被污染？」
Amy續說：「張繼聰今次嘅角色比上次拍《巨輪》更深層次，佢演一個其貌不揚但醒目嘅地產從業員，同李亞男飾演嘅明星相戀，兩個人身份懸殊，佢為咗搵錢，最終入獄，但出獄後，亞男已經嫁咗人，於是為達目的，佢所用嘅手段，好多人認為好奸，但佢嘅抉擇都係為生存，呢個劇唔係一般嗰啲你害我、我害你，演員演技、吸引人嘅情節同埋個劇本身嘅內涵，相信觀眾睇落會覺得新鮮、特別！」
文：影視組