Lea T.認單身惹分手嫌疑
模特兒Lea T.與緋聞男友霍啟山的關係撲朔迷離，從未親口否認拍拖的她，昨日突然自稱單身，兼開口不想有男朋友，行騷時更大晒性感臍環，不禁惹來分手之嫌。
霍啟山緋聞女友兼模特兒Lea T.、趙頌茹（阿Yu）昨日出席香港貿發局舉行的香港時裝節，並為理大碩士畢業生時裝展擔任模特兒行騷。穿上露腰裝的Lea大晒紅色臍環，她表示18歲時在泰國穿的，她說：「平時做騷要我除，今日唔使，我好鍾意個環。」問到會否外遊？她透露明天（9日）便與幾個朋友飛歐洲南部、倫敦及西班牙，問到是否與霍啟山同行？她說：「我諗唔會，阻止唔到佢去邊。我哋仲係朋友，見到面會傾偈。（感情狀況點？）好似Facebook status！我依家係單身，（Available新戀情？）唔可以話available，我想專注工作先，我唔想有男朋友。」之前Lea提及與啟山的關係，還疑幻疑真，今次如此決絕，故看來她與啟山的狀況亦有變。
趙頌茹冇蝦碌
至於同場的阿Yu行騷順利冇蝦碌，談到上次行騷跣腳又差點甩帽，她表示：「經過上次經驗，黐咗雙面膠紙，非常安全。」記者指她全程cool爆行騷，她則解釋：「上一次個騷需要可愛感覺，我本身其實好cool，但心情算輕鬆，依家主力行騷，咁耐冇出嚟做嘢，想攞番多啲舞台經驗。（老公唔在場冇咁大壓力？）唔關事，唱歌就有壓力，以前拍拖時幫佢錄demo，差啲要分手呀！」
父親血癌病逝
另一邊廂的羅敏莊，表示前來支持本地設計師好友Mountain Yam，至於會否擔任模特兒行騷？她自嘲短小冇資格：「畀高大嘅人行啦，怕整闊件衫！」談到老公為何不一同前來時，她表示：「老公去咗加拿大做舞台劇，（唔做跟得夫人？）佢做舞台劇唔似得唱歌咁，唱完一身鬆晒，唔想煩佢。」她繼而透露父親大前晚凌晨因患血癌而逝世，喪禮將月底舉行：「佢病咗一段時間，都好嘅，係一種解脫方式。」提到臨終卻未能見父親最後一面，她表示：「做呢行應承咗人就要做，佢走嗰時我仲要繼續唱，show must go on。」
文：名人組