克勤撐巴西入決賽龔嘉欣唱反調

日內會飛到巴西感受世界盃熱潮的李克勤，日前看完荷蘭對哥斯達黎加的8強戰，之後在微博發出疑問：「想找人解答尹佩斯（荷蘭球員）的隊長臂章為何上下半場會由黃色轉用藍色？是迷信？整爛了？」對此克勤昨日說：「我好想知，最好幫我問一問，我純粹八卦！」據體育界人士表示，隊長臂章顏色是沒有特別的，只是要球隊隊長戴上作識別而已。

譚詠麟讚尼馬

至於明日凌晨巴西對德國的4強戰，克勤看好巴西可晉級：「全世界覺得德國發達，巴西冇咗尼馬，又冇咗隊長堤亞高施華，但我覺得唔係咁睇，實力上德個係秤高少少，但當你球隊嘅一個主將即係尼馬，突然間受傷唔踢得，其餘球員，包括領隊同球迷，其實更加會百分之二百打氣。實力上巴西有所削弱，但士氣方面佢哋會更畀心機，希望打場好波畀尼馬睇，所以如果一定要我揀，我揀巴西晉級。」

克勤指德國實力無疑較好，不過他們之前幾場比賽，尤其是贏法國那場，說服力不強，他說：「唔係大家心目中諗嘅好得咁緊要，而且90或最多120分鐘嘅比賽，乜事都可以發生，我覺得天時地利人和係可彌補實力上不足。」譚詠麟也在微博大讚尼馬，指他傷後沒怨天尤人，態度正確，發揮正能量，是年輕人好榜樣。

嘉欣貼德勝2:1

同樣愛睇波的龔嘉欣，正忙於為劇集《水髮胭脂》拍攝，她坦言如收工趕得及，都會收看巴西對德國一戰，並說：「雖然巴西係主辦國，但尼馬出唔到賽，唔知會唔會因此打亂陣腳。一直以嚟德國都好穩陣，雖然冇邊個球星特別鍾意，不過佢哋整體合作性好高，我諗德國會贏2:1。」

文：音樂組