Naomi寸黃榕出寫真止癮
「寫真元老」黃榕與o靚模馮鎵瀠（Naomi）前晚以性感打扮出席友人生日會，今年繼續出寫真的黃榕被Naomi寸爆！Naomi說：「佢鍾意畀人影，所以先出寫真。」黃榕隨即反擊指Naomi曾拍情慾片：「佢有片畀我睇添，佢叫我睇我都唔想睇！」火藥味甚濃。之後黃榕自爆拍拖時會拍床照，覺得可以留住甜蜜回憶。
黃榕又寸Naomi將自己不喜歡的男仔介紹給她，Naomi解釋因自己只喜歡身形矮小的男仔，故身高1.72米以上的男士會介紹給黃榕，曾介紹台灣男演員張雁名給黃榕。但黃榕稱雖然很喜歡張雁名，但因異地戀，最後未能開花結果。