馬詩慧「催生」 谷女做model
名模馬詩慧（Janet）有女初長成，二女王麗嘉有望繼承模特兒衣缽，麗嘉身材和身高十足索模，連Janet也認為女兒具備做model條件，原本9月麗嘉將往波士頓升學，如今或會轉往紐約讀書，望能在這個模特兒搖籃之地闖出機會。
麗嘉深得父母優良遺傳，身高1米78（5呎10吋），身材均勻，得天獨厚食極唔肥，喜歡英國粗眉超模Cara Delevingne的她，氣質亦與Cara相似。Janet不想子女錯過讀大學的機會，她本人也是20歲入行做模特兒，二女已年屆19，是做model的黃金年齡，加上麗嘉亦有興趣做model，令母女心情矛盾。
想行內衣騷
Janet以「生仔」來形容現時心情：「佢係『生仔』適合年齡，係時候要生，過咗就超齡。尋日問過佢會唔會轉去紐約讀書，然後趁放假上去agency試鏡，但佢有幾個朋友都會去波士頓讀書，所以佢好期待過去一齊讀。不過，佢又唔止一次講過想行Victoria's Secret內衣騷，model做到呢個騷係一個榮譽。」
扶女兒一把
在模界多年，Janet當然會扶女兒一把：「有時見到啲時裝人，都會問吓識唔識Victoria's Secret嘅人。（想囡囡繼承衣缽？）繼承？你估我有十億遺產咩？好多人想做但冇條件，佢有條件點解唔做？嘥咗佢！」麗嘉曾為本地及外地的學生行時裝畢業騷，業餘行騷經驗不少，問她是否想做model？麗嘉直率地說：「仲未知自己想做乜，之前鍾意打高爾夫球，依家有興趣讀室內設計，但行騷都幾好玩。」
場地：Pure Yoga
髮型：BOSCO CHUEN @ MM AVEDA
文：名人組