王璐瑤贏波 嗒糖湯馬士梅拿
一向好「波」的o靚模王璐瑤亦有留意今屆世界盃賽事，並支持心儀的德國隊，化身性感美少女啦啦隊打氣，獲德國隊帶挈贏錢的她，又指湯馬士梅拿靚仔又好波，雖然目前單身，直言不排除試愛德國男！
巴西世界盃掀起全城球迷狂熱，吸引好「波」之人王璐瑤（LuLu）化身做惹火啦啦隊，為心儀的德國隊打氣，以貼身波衫上陣的LuLu，大騷事業線，更豁出去露股邊贈興，她笑言撐德國隊原因簡單：「以前冇睇波，今年見個個都講世盃，所以就奉獻第一次，打算湊吓熱鬧順便投注，試吓自己眼光，買咗好多人都睇好嘅德國隊，結果帶挈贏咗唔少錢，所以決定嚟緊都必撐德國，希望佢哋可以捧走冠軍！」
鍾意有味男
LuLu又大讚球員有魅力：「睇住佢哋跑嚟跑去，流晒汗衝鋒陷陣，覺得好型！唔怕佢哋有臭味，反而覺得係男人味！好似德國隊嘅球員湯馬士梅拿咁，靚仔又好波，我一定支持佢！」問到會否想飛到德國，識個德國男朋友時，她笑言：「未去過德國，唔知德國男仔性格係點，有機會都想接觸吓！」
嫌C朗花心
雖然LuLu對靚仔情有獨鍾，但對另一位球壇萬人迷、葡萄牙的C朗拿度就耍手擰頭，她解釋說：「係就係靚仔，但太花心喇，佢嘅緋聞橫跨黑人白人，咩國家都有，太誇張喇！同埋我以前啲男朋友唔多唔少都係花心男，所以見到C朗唔太鍾意佢。」
場地：The Coffee Academics
文：專案組