沈震軒靚車美人撩比舞
多棲藝人沈震軒（Sammy）日前為首隻跳舞歌曲拍攝MV，出動名車美人，又在中環快閃起舞，一日跳足十多個鐘，體力消耗極大，但Sammy大呼過癮，望在香港樂壇跳出一片天！
無綫藝人沈震軒獲黃柏高（Paco）器重簽做歌手，歌視雙棲機會不斷，日前他為首隻跳舞歌曲《親愛的》拍攝MV，一日內跳足十幾小時，下午時分Sammy與扮警員的舞界紅人Popper 88到中環鬧市街頭的安全島起舞，引來大批途人圍觀，期間更冒雨拍攝，晚上他們移師清水灣片廠，出動五架名車及大批Dancers，更邀得韓模Yura專程來港，非常揼本！
入行前曾苦練舞技三年的Sammy相當跳得，但月前因拍劇整斷手，問到可有影響？他說：「排舞師開頭就住我，主力排下半身舞步，之後再加多啲手部動作，好在冇再整親，舞步係一路排一路改，大部分舞蹈員係我學舞嘅師兄師妹，大家都好配合，感覺好似一齊完成跳舞夢咁！」
視MJ為偶像
雖然近年韓風盛行，但Sammy偶像是美國已故歌手米高積遜（Michael Jackson）及型男Justin Timberlake，因此舞風偏向歐美，他直言相當重視首隻舞曲：「無論整個構思、排舞同曲風都有參與，希望感覺瀟灑啲。（想做香港舞王？）要做更多成績出嚟先敢諗，希望為樂壇跳唱歌出一分力！」MV劇情講述Sammy在街上巧遇Yura，其後靠舞技贏得美人心，更有Kiss鏡頭，Sammy笑說：「導演話既然行歐美感覺，不如去盡啲，要錫，咁我同Yura都幾夾，冇尷尬。」
文：立影