馬國明預告攬女：手下留情
無綫小生馬國明（馬明）、李詩韻、林夏薇及敖嘉年等，昨日大熱天時穿上古裝，搞到大汗疊細汗，在尖沙咀鬧市舞龍巡遊兼派禮物，為新劇《寒山潛龍》宣傳造勢，眾演員沿途被粉絲包圍及「集郵」 。
劇中夏薇和嘉年有不少親熱戲，馬明卻大呻跟「老婆」詩韻冇得親熱。提到在《衝上雲霄II》中被林芊妤（Coffee）胸壓，他笑說：「冇攬過，乜都冇，淨係趴喺我上面，真係冇掂過，好慘！（恨？）唔係，係我不嬲冇乜艷福。」
李詩韻幫撩鼻
馬明又力撐Coffee與有米男「男未婚女未嫁」，在殘廁親熱非大事，大家毋須啄得太緊：「聽講佢哋冇做過啲咩，可能有錫，但好多情侶都喺公園、地鐵攬錫啦，第時我喺公共場所攬女，大家手下留情呀！」
詩韻則透露自度Sweet爆橋段，用手指為馬明撩鼻哥，她笑謂：「戲裏戲外都係第一次幫人撩鼻，我覺得比吻戲更親密，相信觀眾唔會覺得核突，會覺得好cute。」
文：影視組