Jenna Lyons愛徐濠縈夠膽識
美國時裝品牌J.Crew正式登陸香港，創作總監Jenna Lyons精挑三位定居香港，並各具特色的女士，當中包括潮人徐濠縈，展示品牌服飾，讓大家親眼看清不同女性的魅力，以行動證明香港女性的多樣性及可塑性。
品牌創作總監Jenna Lyons笑言愛美是女生的天性，每個女生都有不同的品味及衣着風格，她認為J.Crew就是要讓不同的女生找到自己的個人風格，而並非單單盲目地追隨着潮流走。為隆重其事，J.Crew正式進軍香港，Jenna專誠邀請來三名香港女性潮人代表徐濠縈（阿徐）、連卡佛時尚總監Sarah Rutson及國際雜誌《Monocle》的香港區總編（Hong Kong Bureau Chief）Aisha Speirs，展示不同風格的時尚女性美。
三位唔同風格女性
為何偏偏選中她們三人呢？Jenna娓娓道出對她們的印象：「佢哋三個係好有個性、而且完全唔同風格嘅女人。Sarah作為連卡佛時尚總監，當然成日都接觸到最潮、最新嘅潮流資訊，佢係mix & match嘅能手，佢會着唔同品牌嘅服飾，而我每一次見到佢，佢都着得好時尚優雅，令我印象深刻。Aisha就成日以tomboy形象示人，充分顯示到中性打扮嘅魅力。阿徐打扮好有趣同大膽，就算佢着一件好斯文嘅衫，佢都會襯一對好colourful嘅花花鞋，好有佢個人風格。」她還大讚阿徐的衣着風格及打扮，與她的性格一樣有趣，很有sense of humor。「阿徐會將啲頭髮染唔同顏色，又會着到花喱花綠，睇到都令人覺得好開心，顯示到佢貪玩嘅性格。」
推出加加加細碼衫
Jenna透露自己因工作而來港近六、七十次，更笑言從前從未想過會在香港開分店。「其實當初係Sarah邀請我哋同連卡佛合作，因為佢自己好鍾意着J.Crew嘅衫，覺得適合香港市場，而我哋亦都好有興趣，依家吸取咗足夠嘅經驗，的確令我哋打咗支強心針。」她認為香港就是一個可以容納不同造型、風格的時尚之都，故她暫時亦未有打算推出任何香港或亞洲特別版衣服，但鑑於亞洲人的身形普遍比西方人嬌小，故香港店會加入「加加加細」碼衣服，以滿足顧客的需求。
但作為時刻走在潮流尖端、甚至創造潮流的人，Jenna又從哪裏吸取靈感，打造千變萬化的潮流王國？她笑言：「其實我成日都會遇上冇靈感嘅情況，每當去到樽頸位，諗極都諗唔到新嘅idea，我就會放低手上面嘅工作，畀自己個腦放鬆吓。因為愈逼自己反而愈諗唔到嘢，反而睇吓書、出吓街、望吓風景同途人，靈感就會突然返嚟搵你。」
J.Crew與連卡佛合作兩年，以shop-in-shop的形式試探香港市場水溫，了解亞洲市場的需要。早前品牌正式登陸香港，更一口氣於中環開兩間分店，要做到所推出的產品均符合國際市場口味，Jenna Lyons絕對功不可沒。
採訪：龔凱欣
攝影：張福宏