陳慧琳完美化身
女星們鬥到上海，每位女星均「裙」情洶湧，個個無需裝「胸」作勢，「簡」單來個正面交鋒，星級造型師Ricky Kwok（郭慶彬）最後選出潮媽陳慧琳（Kelly）高姿態勝出，他認為無需珠光寶氣，憑perfect match造型，Kelly贏得乾乾淨淨。
陳慧琳
裙款好clear，佢嘅高佻身材撐得起，妝容同髮型都配合得完美無瑕，加埋個clutch又增添潮味，無需珠光寶氣，反而着出一份少女味道，真係有種不食人間煙火嘅脫俗仙女feel。
妮歌娜佩絲（Nicola Peltz）
「上半身着得好靚，凸顯肩線，但下半身好明顯唔夠高撐起條裙，搞到好似將地拖着上身，好笨重。佢咁後生就唔好化個smokey eyes濃妝強裝成熟，反而化個淡妝更青春可人。」
Angelababy
「條裙佢着得幾好睇，完全冇出錯，啱晒佢身份同年紀，唯一衰在佢襯錯花朵手袋，拖垮成個造型，感覺師奶咗，依家完全搞到格格不入，襯番個淨色手袋會順眼得多。」
周秀娜
「裙款幾靚，但唔知點解佢咁瘦，條入膊裙都着到佢膊位好橫，搞到佢成個男人膊咁，一啲美感都冇，而且髮型又出事，凸顯出佢闊面大口，如果轉直髮造型會更清雅。」
李冰冰
「裙款剪裁獨特，顏色又sharp，奈何佢高度有限，着到個裙襬位一舊舊，感覺好論盡，雖然佢自知矮小，識得襯對厚底高跟鞋，不過就揀錯款，如果唔係厚底會冇咁娘！」
簡單美
要着出「Less is More」的最高境界的穿衣之道並不容易，唔襯首飾又畀人覺得單調，若然襯得多又會感覺too much而怪相，要着出簡單就是美是一門高深學問。近期素色連身裙或長或短都深得女星愛着，只要視乎款式配襯耳環或頸鏈已簡約優雅。
Profile
著名星級造型師Ricky Kwok（郭慶彬）曾遠赴米蘭與巴黎，出席品牌Max Mara、Sportmax、Chanel、Valentino、Gucci與Jean Paul Gaultier等時裝周，也曾被邀在中國時尚節目《美麗俏佳人》擔任嘉賓主持，現於電台擔任客席嘉賓大談時裝之道與配搭技巧，近年也被各大品牌邀請客串造型顧問，為VIP提供服飾資訊與配搭技巧。Ricky曾為李冰冰、吳君如與張惠妹等擔任造型師，地位備受肯定。