Kenny捱苦買磚頭 一日兩中暑
英皇藝人關智斌（Kenny）近年主力返內地拍劇，雖長時間跟家人分離異地，但憑在港的知名度，除賺得幾桶金成功買樓做業主外，亦贏得「神州第一美男」美譽，但Kenny卻說有苦自己知，早前在酷熱天氣下拍劇終告中暑。
Kenny由2009年開始拍攝第一齣內地劇《蓮花雨》，在短短五年共接拍了逾9齣內地劇「升呢」為內地「男一」，最近他憑一張「無添加」的俊臉，被內地傳媒封為「神州第一美男」，對於此封號，正在內地拍劇的Kenny哈哈大笑說：「係有人講過我知，但我覺得好肉酸囉，不過都開心有人讚我，要多謝阿爸、阿媽。」
心如愷威天然美
問是否因為曾合作拍劇的藝人傳多屬「膠面」人，故「物以罕為貴」才獲得力捧？Kenny又哈哈笑說：「我唔覺得同我合作過嘅演員個樣有變同唔自然喎，個個都係靚仔、靚女，好似林心如、劉愷威，全部都好真、好靚。」他謂在內地拍劇酬勞豐厚，但他自言也付出過不少努力，也捱過不少苦，回想當初孤身到內地拍劇，已習慣被同事照顧的他，突然要照顧自己，令他大感辛苦，最令Kenny難受是：「我要接啲客串嘅角色，做賊、路人，甚至強姦犯角色。」
「啲錢唔易搵o架」
日前Kenny在內地拍攝《天天有喜2之人間有愛》時，在微博呻「連續77天了……終於……終於……中暑了……。」他接受長途電話訪問時說：「因為啲戲服好厚，又要打啦，又要着盔甲，又要戴頭套，氣溫都成36、37度，仲要喺無遮無擋嘅山上拍，所以呢幾日暈暈哋，（使唔使入醫院呢？）咁又唔使，工作人員有畀藥我食，幾年前仲慘啦，試過一日中兩次暑，休息幾個鐘又彈番起身再拍過啦，所以啲錢唔易搵o架。」而Kenny在新劇中的造型似足曾由英國型男奧蘭度布林飾演的神箭手角色，難怪他也在微博說：「今天好像去拍《魔戒》了。」
文：音樂組