AOA開出條件 期待有緣人

組合AOA的大Ann（吳燕珊）及細Ann（吳燕菁）向來主攻樂壇，早前細Ann有機會發揮演技，在劇集《女人俱樂部》中飾演「少年江欣燕」Cyndi，因而人氣急升，細Ann過足戲癮兼贏得友誼，大Ann亦戥妹妹開心。

姊妹齊拍劇

細Ann表示與一眾少女演員仍保持聯繫，希望繼續合作，更希望下次加入家姐大Ann：「好多拍戲點滴都好似尋日發生咁，好唔捨得！我哋M Club會繼續延續，其實唔止七個人o架！係八個人，好多聚會大Ann都有參與，之後如果有電影版或者舞台劇就好，可以加條線，大Ann演我失散姊妹吖！又或者我哋七個女仔拍《鹿鼎記》，我同大Ann一齊演雙兒，應該好得意！」

不再做宅女

提到好友陳嘉寶及王敏奕均被揭有拖拍，但大細Ann仍未嘗初戀，細Ann直言羨慕：「覺得佢哋好sweet，呢樣係緣分，我新年有買桃花，希望有用啦！以前我哋細膽啲被動啲，父母唔畀咁早拍拖，我哋又宅，做完嘢就返屋企。（叫朋友介紹？）會呀！」大Ann亦表示以前太怕醜，遇到心儀對象會躲起來，怕連朋友也做不成：「我以前個花名叫冰山，好cool唔笑，但依家唔會喇！我都可以好熱情，之前我哋玩塔羅牌占愛情，冇講幾時有拖拍，只係話細Ann感情會比較轉折。」

兩姊妹外形超似，但擇偶條件不同，大Ann喜歡幽默有愛心的陽光男，細Ann則對思想成熟的斯文男情有獨鍾，並說：「外形冇咩所謂，最緊要高過我。」

攝影：嚴偉國

場地：瑞士啡室

髮型：Roy＠Nova Salon　

服裝：Roxy　

鞋履：Oriental Traffic

文：立影