邀全智賢代言 翁嘉穗有信心
憑韓劇《來自星星的你》而人氣暴升的全智賢，吸引不少名牌叩門合作，「星星迷」兼「海馬集團」老闆娘翁嘉穗亦開出近千萬酬金，力邀全智賢出任床褥代言人。對於有指工作爆滿的全智賢未為所動，但翁嘉穗強調對方仍未婉拒。她說：「我哋仲喺傾談過程中，佢咁嘅級數藝人，韓國嗰邊嘅要求好嚴謹，問好多問題，例如喺邊度拍？又希望我哋用佢哋團隊拍攝。咁我哋都有自己嘅考慮，因為除咗香港同中國，我哋仲有星馬、印尼、澳洲、美國同歐洲市場。」
翁嘉穗坦言以往品牌起用的女星汪明荃同李冰冰，皆屬資歷深、受歡迎的大明星，故洽談絕不能倉卒決定。她又指海馬床褥今年連續25年香港銷量冠軍，將會於內地有大型慶祝活動，準備邀請代言的李冰冰、汪明荃等出席，如果傾談順利，全智賢當然亦會被邀，更會考慮開拓南韓市場。問到跟全智賢合作的信心如何？她表示樂觀，因大家都很有誠意。