張智霖肌不可失出底牌
快將踏上紅館舞台的張智霖（Chilam），近日密密為演出操肌，自言身形已達「展覽級別」的Chilam，指其完美體形屬「期間限定」，有意在身形走樣前拍內褲廣告和出寫真留「倩影」。
即將在7月6日開始演出一連三場《Chilam Crazy Hours Live 2014》演唱會的張智霖，昨日下午現身排舞室，跟一班舞蹈員齊齊為演出進行綵排。自言為演出戒食、戒睇波的他笑說：「希望快啲做完，唔想要咁先自律生活，其實我好放縱，尤其是一班之前做完演唱會嘅朋友，好似蔡一智佢哋，成日約我出去食飯。」
身形「期間限定」
經過兩、三個月的節食，Chilam已成功減去二十多磅，他揚言演唱會上一定騷肌：「唔可以唔攞出嚟展覽吓！」笑言如果近期有內褲廣告接洽，亦會考慮騷quali：「公司話真係有內褲廣告搵我，我OK呀。我唔知呢個身形可以keep幾耐，所以要拍就快喇。」由於他坦言體形屬「期間限定」，故此更有意拍寫真：「我都真係想影，留『倩影』。」
談到演唱會嘉賓，Chilam透露已邀得張家輝擔任，他說：「依家仲考慮緊同佢玩咩，或者到時鬥做掌上壓。」至於身在內地拍劇的太太袁詠儀（靚靚）即將回港，他笑說：「佢返嚟即係我嘅假期亦宣布結束，有佢陪我，的確係起到監察作用，等我唔會偷嘢食。」
文：音樂組