祖兒咀慧嫻 劉浩龍（目及）實
陳慧嫻一連三晚在紅館舉行的「BACK to PRISCILLA陳慧嫻30周年演唱會」前晚圓滿結束，徐小鳳、李克勤、譚詠麟、舊愛區丁玉等到場支持，星光熠熠，不過全晚焦點落在嘉賓容祖兒和男友劉浩龍（師兄）身上！祖兒早前開騷，師兄未有到台前支持，反而今次兩人坐在觀眾席一前一後睇騷，原來全賴慧嫻暗中策劃。
雞啄唔斷
祖兒上台和慧嫻合唱《痛愛》後，兩人即來個咀嘴，其後燈光打落坐在台下的師兄，慧嫻說：「其實我同阿龍有啲淵源，佢以前嚟過我屋企同我細佬玩。」祖兒不但毫不介意「龍兒戀」被擺上枱，更大爆：「佢同我講『我嗰時見到慧嫻喺屋企着短褲o架！』」到祖兒獨唱《LOVE ME ONCE AGAIN》前，她向師兄隔空傳情說：「細細個聽呢首歌，都會幻想有位白馬王子喺度同我翩翩起舞。」慧嫻在尾聲時唱《戀戀風塵》後，一度感觸爆喊。
完騷後，師兄到後台迎接祖兒，兩人旁若無人雞啄唔斷，慧嫻更着師兄：「你幫我送佢返屋企！」慶功宴上，慧嫻大爆是她邀請師兄睇騷，無意間促成兩人首度在紅館公開同場出現。而慧嫻也與舊愛區丁玉合照，更稱每次演唱會都要對方在場才會安心。
文：音樂組