傅穎搵人仔避是非
近兩年長駐內地工作的傅穎（Theresa）甚少在港露面，昨日出席活動時謙虛指自己在內地是新人，否認搵得多，不過就坦言在內地工作是非少，故比在香港開心。
長駐在內地拍劇賺人仔的傅穎昨日身穿紅色露腰裙出席「apm早晨！全城瞓醒睇世盃！」，與新鴻基地產租務總經理馮秀炎以及國際殿堂級普普藝術家Romero Britto一起為全港首個足球藝術展館主持揭幕禮， Britto於1963年出生於巴西，他擅長以鮮艷色彩去傳遞希望與幸福訊息，其作品曾於世界各地博物館展出。他與世界盃甚有淵源，曾擔任2010年世界盃的官方藝術家，今年更是巴西世界盃大使。
接受微調靚樣
近兩年在內地工作的傅穎表示已一年未有出席香港活動，問她是否在內地賺很多時，她謙虛表示：「唔係，多謝導演畀機會。（香港活動難請得郁你？）唔係，睇吓劇組放唔放人。（喺內地賺得多？）我喺內地係新人，點會搵好多。（多過香港？）唔同，但喺內地做嘢，成個劇組相處好開心。（冇香港咁多是非？）都係。（怕唔怕香港觀眾忘記你？）我七月會拍一套香港電影，詳情未公布得住。」
談到傅穎的樣子與以前大有不同，她笑言：「可能你哋耐冇見我，你都未見過我冇化妝嘅樣。」問到怕否被指整容？她直言無所謂：「講咗十年有多，我唔介意打針，如果將來老咗有皺紋會考慮。（你係純天然？）你覺得我唔係天然？不過演員應該以最佳狀態見觀眾，微調我可以接受。」記者又指其上圍也比以前豐滿，她笑言因練腹肌。至於感情生活，她自稱單身，但身邊不乏追求者。
出席嘉賓還有歌手陳逸璇、模特兒Ana R.及Lea T.。問到Ana R.有否留意世界盃時，她笑言：「我仲有energy睇，我老公係英國人，佢對於英格蘭輸咗好失望，好唔開心，我就捧西班牙同南韓，因為我爸爸係西班牙人，我媽咪係韓國人。」而下嫁了墨西哥籍丈夫的陳逸璇，透露近年成為駐港墨西哥旅遊大使。
文：名人組