廖碧兒品味心情

廖碧兒於2000年參選溫哥華華裔小姐競選奪魁，隨後參選2001年國際華裔小姐競選亦奪冠，順理成章展開演藝生涯，她很感謝神的眷顧，備受公司力捧，得到很多演出機會，及後並當上無綫電視花旦。星途暢通無阻，同時也受到品牌寵愛，工作接踵而來，這時才真正接觸何謂時裝與時尚，她說：「我自小喺加拿大長大，當地人啲衣着好隨意，以簡單舒服為主，無潮流可言！」人紅了，荷包脹了，卻沒有令她成為名牌奴隸，開始學習配搭技巧與穿衣之道，漸漸令她明白到時裝真諦：「時裝係一門高深學問，我天生唔係購物狂，我都會貪靚，但唔講究，不過時裝方面我係從零開始，當然我撞過板，試過亂襯一通，又或者衣不稱身，人要成長就要經過失敗過程。其實，時裝好簡單，就係要懂得配搭之道，我平貴都會買，唔會只崇尚名牌，不過自問資質低，至今在配搭技巧仍需改進，哈……」

彩袋襯素衣

屬於高頭大馬型的Bernice很清楚自己體形，明白有些衣服款式是不能穿，否則便出事：「咁多年，我磅數差唔多，冇乜升跌，只係服裝款式會影響到我畀人視覺上係肥定係瘦，所以入膊款式係我大忌，會着到我好大隻！」她又說近年轉攻買手袋，最愛撞色配搭，令造型更有簡約時尚美：「衫會買好簡單款式同subtle顏色，因為襟興又易襯，可以着完再着都唔覺，之後襯番個鮮色手袋，我覺得好型，造型又唔悶，感覺好fresh。」Bernice自言沒有特定的穿衣風格，大多是隨着心情而配搭：「穿衣打扮會透露一個人心情係開心定唔開心，我着衫都好睇心情呀！」

Bernice坦言穿衣風格會透露自己心情。

廖碧兒是2001年國際華裔小姐冠軍，身材健美的她穿上泳衣凸顯體態美。

愛網上購物

Bernice坦言不太享受購物樂趣，不會為買而買，而是有目標去買：「我平時都會着得好casual，夏天咪T恤襯牛仔褲、冬天咪襯多件皮褸，都係以舒服為主。我唔係唔鍾意shopping，而係我每日瞓醒就開工拍戲，由朝拍到晚，有時仲要返大陸工作，真係日夜顛倒，買啲衫返嚟邊有時間着，唔通只係着畀自己睇？所以唔使拍戲時，就好享受扮靚靚，約埋三五知己食飯，摸酒杯底談心。」她稱近年也愛上網購，全因方便又快捷，笑說：「我怕好多人行街，得個逼字，但網購就可以喺屋企舒舒服服，坐喺電腦前慢慢揀，依家有啲網站仲可以做到一日送貨，唔啱仲可以喺限期內退換。」

放大圖片	廖碧兒十分欣賞華人傳奇鞋王Jimmy Choo的設計才華。	經營紅酒生意的廖碧兒很懂得享受人生。

情迷高跟鞋

碧咸嫂Victoria Beckham經常被指過分奢侈，曾因一個「愛」字，便把心愛的款式全部顏色買下，估不到Bernice也有這個「癡」根，她說：「我曾經一口氣買下三種顏色的同款ballerina（芭蕾舞平底鞋）！」她對高跟鞋的鍾愛程度也像Victoria，更愛向「高」難度挑戰：「我對高跟鞋特別情有獨鍾，雖然平時少着，但我一見到高跟鞋就好自然會心動，仲愈買愈高，我仲當藝術品欣賞。」她稱最愛的鞋履品牌是Jimmy Choo與Giuseppe Zanotti Design，而時裝品牌則是Alexander Wang。

時尚文化話紅酒

近年成功經營紅酒生意的廖碧兒，回想當初自己對紅酒一竅不通，直到現在精通紅酒知識，都是需要時間經營得來，她認為紅酒既是一種文化，也是一種時尚，紅酒與時尚有着密切關係：「兩者都係品味生活，我覺得係文化追求的根本，當中需要過程去學習、研究同接受！」她坦言品嘗紅酒已成為時尚有品味的潮人藝術。

採訪：劉慰思

攝影：劉智源

服裝：Lane Crawford

高跟鞋：Jimmy Choo