陳嘉寶王敏奕 Woman密報
陳嘉寶（Anjaylia）及王敏奕（Venus）憑電視劇同時彈出，但兩人沒爭風呷醋，反而感情極佳，兩人一見面就話題多多，Venus更搞笑向Anjaylia示愛，提到雙雙獲封為「玉女接班人」，她們因不想框死自己而拒做玉女，並且爆了不少自己的秘密！
陳：陳嘉寶 王：王敏奕
筆錄：立影
初次見面
Anjaylia及Venus憑無綫劇《女人俱樂部》人氣急升，兩人初次「邂逅」是在劇集試鏡，並對對方留下好印象，其後日夕相對，Venus更笑言愛上Anjaylia。
陳：試鏡嗰時，你係咁話好凍，唔係好舒服，當時我覺得你好靚，對戲時發覺你好聰明，啲光芒收唔埋。
王：當時真係唔舒服，我就覺得你又靚又瘦，有氣質。其實我經理人（麥曦茵）拍過你，佢對你有好高評價，我要向你學習。
陳：我第一次拍麥曦茵，當然要表現得專業啲，之後同你相處就自然好多。
王：跟住我愈來愈鍾意你，唔好意思，突然間表白咗。
陳：快啲送花啦！
王：咁熟唔使啦，我覺得你優點係好認真，對友情、工作都好負責任，缺點係執着啲。有次大家搵唔到我，你以為我交通意外，擔心到喊，我知道咗又喊埋一份。
陳：當時成日拍通宵，精神唔好，驚瞌眼瞓有意外呀。你優點係埋位演出前已處理好晒，缺點係大頭蝦，成日漏嘢。
少女夢想
小時候大家作文都寫過「我的志願」，Anjaylia及Venus志願多多，對於長大後獲封為宅男女神及玉女，兩人直言只想做個好演員。
陳：細個第一個志願係做美少女戰士，之後想做警察。小學時有作品貼堂，就想做作家，見到《壹號皇庭》啲律師好型，又想做律師。
王：我都係對好多嘢有憧憬，細個想做空姐，到中七第一次坐飛機就發現冇可能，因為遇到氣流好辛苦。至於演員，係緣分令我有得拍戲，我愈來愈鍾意。
陳：近排我哋拍電視劇多咗人留意，有粉絲封我哋做「宅男女神」或「新一代玉女」，但我覺得周慧敏、李若彤先係女神。
王：我嘅女神係張曼玉，佢好有性格，keep住自己態度，有睇法、堅持，又有魅力。
陳：我鍾意周慧敏，因為佢有獨特吸引力，對宗教、慈善好有熱誠，用自己影響力幫人，內外都咁靚。
王：有女神、玉女呢啲稱呼都係讚美，但我會繼續做好自己，唔會話想要咩封號。
陳：係，我覺得呢啲封號係框住自己。
王：做演員唔應該限死自己，乜都要試。
姊妹趣事
三個女人一個墟，M Club有七位少女，自然嘈到拆天，Anjaylia、Venus與賴慰玲、糖妹、吳嘉熙、吳燕菁及陳瀅結拜成七姊妹，更會喪玩到不顧形象。
陳：記得戲中有場泳衣戲，成班女仔唔覺得尷尬，反而好好玩。
王：嗰兩日好曬，只想快啲落水，糖妹有帶相機，我哋幫自己影咗批寫真。
陳：我哋仲發現爽身粉係萬能，有唔舒服，拎出嚟搽就舒服晒，好似聖藥。之後如果嗌交，我哋就會叫大家搽爽身粉，搞吓爛gag。
王：我哋仲做咗好多唔顧形象嘅嘢，前排「大家姐」賴慰玲話佢instagram有10萬粉絲就送「絲襪照」，未經我哋同意就應承咗，結果我哋齊齊用絲襪笠頭影相！
愛情密偈
Venus及Anjaylia近日戀情相繼曝光，Venus被揭與曾志偉兒子曾國祥拍拖，Anjaylia則情傾金融界才子，對於感情事連番被報道，兩女處之泰然。
王：我哋咩都會傾，近排大家關心多咗我哋係好現象，證明有人留意，唔會覺反感。
陳：我都覺得如實報道冇咩所謂。我哋起初（拍拖）都會同對方講，我聽咗好多嘢，不嬲好欣賞佢（曾國祥），佢做戲好好，有睇佢嘅電影，佢好有風度，期待合作。
王：你嗰個都好有風度，好好人，一樣咁好啦。好女配好仔！
陳：Winki（賴慰玲）就藝術女配藝術男！
王：希望各位姊妹幸福，齊齊有拖拍！
後記
Anjaylia及Venus近期經常孖住出席活動，默契倍增，互望一眼便可擺出合拍甫士，訪問期間Anjaylia的頭髮被風吹亂，Venus即為她梳理，Anjaylia亦為對方整理衣服，姊妹情深。
陳嘉寶 Styling：Charles Lam
服裝：Loveis
王敏奕
化妝：Onetung Ma
髮型：Bowie Lo＠fifth salon
服裝：initial
攝影：司徒國榮
場地：The AIR