克勤硬撐英軍阿叻彈冇料
西班牙在世界盃分組賽出局後，意大利昨日爆冷輸波，除令自己陷入出局邊緣，同時宣判同組的港人愛隊英格蘭「死刑」。英格蘭球迷李克勤難掩失望之情，但對英軍仍不離不棄繼續「硬撐」，希望愛隊四年後捲土重來，阿叻陳百祥則彈英軍唔夠班。
意大利昨日在世盃分組賽爆冷不敵哥斯達黎加，令同組連輸兩仗的英格蘭出局，圈中頭號英格蘭粉絲李克勤昨接受電話訪問時難掩失望之情，並謂：「預咗，支持咗咁多年，無論表現點都撐落去，希望四年後有新一班人再嚟過。」
阿根廷勁過巴西
克勤認為最有冠軍相的不是巴西，他睇好阿根廷及德國：「阿根廷適應到南美天氣，佢哋球員技術好過巴西，冠軍球隊未必一開始就踢得好。德國就全世界都知係熱門，整體發揮好好。」
陳百祥則認為捧英軍是「含淚買上盤」：「香港人鍾意英格蘭係情意結，英超好睇係因為外援，佢哋其實唔夠班。」阿叻又分析今屆名牌球隊失準原因：「西班牙老化，六年嚟踢法冇變過，畀對手睇穿，出局合理，意大利亦青黃不接。」
黃心穎力捧的西班牙與英格蘭雙雙出局，她說：「我專登睇意大利，希望佢哋幫到英格蘭，點知意軍同哥斯達黎加好似夾埋想英格蘭出局。」
鄧佩儀扮比利
另外，在巴西為無綫採訪的鄧佩儀近日參觀球王比利的博物館，更扮比利擺甫士，並與馬啟仁在巴西街頭跳「忘情森巴舞」。
文：影視組