黃榕操弗肌女誘fans
「寫真戰元老」黃榕將第四度推出寫真，並以健美肌女形象誘fans！日前她身穿紅色三點式「胸降」旺角著名graffiti後巷，玩滑板又踩單車，性感型格兼備。
33歲性感女星黃榕已是第四年參與寫真戰，為免被後浪湧走，不得不玩玩新意思，加入自己最喜愛的跳舞藝術元素，包括hip hop、jazz及鋼管舞，並會執筆分享減肥操fit心得。日前黃榕突襲旺角洗衣街後巷的graffiti牆拍攝外景，原本她身穿籃球背心，其後大方除剩內裏的紅色三點式，谷出加大碼C cup胸，她拿起滑板及踏上x-game單車擺甫士，性感之餘不失型格！其實該graffiti牆在hip hop界甚有名氣，不時有外國遊客前來拍照，適逢當日有兩名女途人在場，亦忍不住對性感黃榕眼望望。
拒跟o靚模相提並論
現場見黃榕身段明顯變結實，她表示近月愛上跳鋼管舞，加上跳hip hop，一星期舞足四日，令她增肌不少：「幾攰都堅持會做500吓sit up先瞓，依家有手瓜同腹肌，最希望有馬甲線。（男仔有咩評價？）冇咩男仔會睇到喎！依家冇拍拖，好dry！有少少腹肌係性感啲嘅，相信fans會鍾意，女仔有肌肉仲好睇，今次最大進步係體能好咗，影好耐相都唔攰。」
對於近年o靚模宣傳伎倆愈見低俗，曾送內褲予fans的黃榕突然潔身自愛：「大家愈來愈為露而露，冇美感，我希望自己本寫真係有藝術同潮流元素！宣傳橋唔會太低俗，會收斂啲，唔想同某啲人相提並論。（有信心銷量稱冠？）都有，好多贊助商同fans支持。」
文：影視組